തേഞ്ഞിപ്പലം: ജൂനിയര്‍ ആണ്‍കുട്ടികളുടെ ഹാമര്‍ത്രോയില്‍ റെക്കോര്‍ഡ് സ്വര്‍ണവുമായി ശ്രീവിശ്വ. പറളി എച്ച്.എച്ച്.എസിലെ ഒന്‍പതാം ക്ലാസ് വിദ്യാര്‍ഥിയായ എം ശ്രീവിശ്വ 2014 ല്‍ കോതമംഗലം മാര്‍ബേസില്‍ എച്ച്.എച്ച്.എസിലെ മുഹമ്മദ് ഇജാസ് സ്ഥാപിച്ച 47.96 മീറ്റര്‍ ദൂരം മറികടന്നാണ് സ്വര്‍ണം നേടിയത്.
49.96 മീറ്റര്‍ ദൂരത്തിലേക്ക് ഹമര്‍ പറത്തിയാണ് റെക്കോര്‍ഡ് സ്ഥാപിച്ചത്. ഈ വര്‍ഷത്തെ സംസ്ഥാന ഇന്റര്‍ ക്ലബ്ബ് മത്സരത്തിലും സംസ്ഥാന തല ജൂനിയര്‍ മീറ്റിലും റെക്കോര്‍ഡോടെ സ്വര്‍ണം നേടിയിരുന്നു. ഇതോടെ ഈ വര്‍ഷം മൂന്ന് സ്വര്‍ണമാണ് ഈ കായിക താരം നേടിയത്. 2014 ല്‍ നടന്ന സംസ്ഥാന സകൂള്‍ മീറ്റില്‍ സബ് ജൂനിയര്‍ വിഭാഗത്തില്‍ ഹൈ ജംപില്‍ വെള്ളി നേടിയെങ്കിലും പിന്നീട് ഹാമര്‍ ത്രോയിലേക്ക് തിരിയുകയായിരുന്നു. കഴിഞ്ഞ വര്‍ഷം നടന്ന സംസ്ഥാന മീറ്റില്‍ ശ്രീവിശ്വ നാലാം സ്ഥാനത്തായിരുന്നു. പിന്നീടുള്ള കഠിന പ്രയത്‌നവും സ്‌കൂളിലെ കായികാധ്യാപകന്‍ പി.ജി മനോജ് നല്‍കിയ മികച്ച പരിശീലനവുമാണ് ഈ താരത്തെ ഉയരത്തിലെത്തിച്ചത്. സ്‌കൂള്‍ അധ്യാപകനായ പാലക്കാട് വടക്കുംതറ മുത്തുകൃഷ്ണന്റെയും അരുണയുടെയും മകനാണ് ഈ കായിക താരം.