ന്യൂഡല്‍ഹി: നോട്ട് പിന്‍വലിക്കലിനു പിന്നാലെ ഡിജിറ്റല്‍ പേയ്‌മെന്റിനു വേണ്ടി പ്രധാനമന്ത്രിയും സര്‍ക്കാരും ഇടയ്ക്കിടെ ആഹ്വാനം ചെയ്യുമ്പോഴും നിലവിലുള്ള സുരക്ഷാ സംവിധാനം ചോദ്യചിഹ്നം തന്നെയായി ബാക്കിയാവുന്നു. ഡിജിറ്റല്‍ പേയ്‌മെന്റിനായി ഇ- വാലറ്റ്, എം- വാലറ്റ് തുടങ്ങിയ സംവിധാനങ്ങളില്‍ എത്രത്തോളം സുരക്ഷിതത്വമുണ്ടെന്ന് സംശയകരമാണെന്ന് വിദഗ്ധര്‍ പറയുന്നു.

നോട്ട് പിന്‍വലിക്കലിനെത്തുടര്‍ന്ന് രാജ്യത്ത് ഡിജിറ്റല്‍ പേയ്‌മെന്റ് സംവിധാനങ്ങള്‍ ഉപയോഗിക്കുന്നവരുടെ എണ്ണം കുത്തനെ വര്‍ധിച്ചിട്ടുണ്ട്. രാജ്യത്തെ വലിയ മൊബൈല്‍ വാലറ്റ് കമ്പനിയായ പേടിഎമ്മില്‍ 70 ലക്ഷം ഇടപാടുകളാണ് ഈയിടെ മാത്രം രജിസ്റ്റര്‍ ചെയ്തത്. മറ്റൊരു വാലറ്റായ മൊബിക്വിക്കിന്റെ ലൈറ്റ് വേര്‍ഷന്‍ കഴിഞ്ഞമാസം അവസാനമാണ് പുറത്തിറക്കിയത്. അതിനുശേഷം ഇതിലൂടെ രജിസ്റ്റര്‍ ചെയ്തത് 20 ലക്ഷം ഇടപാടുകള്‍.

എന്നാല്‍ രാജ്യത്തെ എ.ടി.എമ്മുകളിലൂടെയും നെറ്റ് ബാങ്കിലൂടെയും നിരവധി തട്ടിപ്പുകള്‍ ഇടയ്ക്കിടെ നടക്കാറുണ്ട്. വിദേശികള്‍ക്കടക്കം നല്ലൊരു പങ്കുള്ള ഈ തട്ടിപ്പുകളില്‍ അധികം പേരും പിടിയിലായിട്ടില്ല. പണം നഷ്ടപ്പെട്ടവര്‍ക്ക് പോയെന്നു മാത്രം.

ഡിജിറ്റലൈസേഷന്‍ സൈബര്‍ കുറ്റവാളികള്‍ക്കെതിരെ കരുതല്‍ ശക്തമാക്കേണ്ടതിലേക്കാണ് ചൂണ്ടിക്കാണിക്കുന്നതെന്ന് ഇന്റല്‍ സെക്യൂരിറ്റി മാനേജിങ് ഡയരക്ടര്‍ ആനന്ദ് രാമമൂര്‍ത്തി പറയുന്നു. ഐ.ടി നിയമപ്രകാരവും സൈബര്‍ കുറ്റനിയമ പ്രകാരവും വാലറ്റുകള്‍ക്കും ശക്തമായ സുരക്ഷയൊരുക്കണമെന്നും അദ്ദേഹം ആവശ്യപ്പെട്ടു.

ഇ വാലറ്റുകള്‍ അപകട സാധ്യത കൂടിയ മാധ്യമമാണെന്ന് ഐ.ടി റിസ്‌ക് അസെസ്‌മെന്റ് ആന്റ് ഡിജിറ്റല്‍ സെക്യൂരിറ്റി സേവന ദാതാക്കളായ ലൂസിഡോസിന്റെ വിഡിറ്റ് ബാക്‌സിയുടെ ഡയരക്ടര്‍ പറഞ്ഞു.