തിരുവനന്തപുരം: ഈ വര്‍ഷത്തെ അഖിലേന്ത്യ പൊലിസ് സയന്‍സ് കോണ്‍ഗ്രസ് ഇന്നും, നാളെയും തിരുവനന്തപുരത്ത് നടക്കും. പൊലിസ് പ്രവര്‍ത്തനങ്ങളുമായി ബന്ധപ്പെട്ട നവീന ശാസ്ത്രസാങ്കേതിക മുന്നേറ്റങ്ങള്‍ പരിചയപ്പെടുത്തുന്നതിനും ചര്‍ച്ച ചെയ്യുന്നതിനുമാണ് ബ്യൂറോ ഓഫ് പൊലിസ് റിസര്‍ച്ച് ആന്‍ഡ് ഡെവലപ്‌മെന്റ് എല്ലാവര്‍ഷവും പൊലിസ് സയന്‍സ് കോണ്‍ഗ്രസ് സംഘടിപ്പിക്കുന്നത്.
രണ്ടുദിവസത്തെ സമ്മേളനത്തില്‍ കുറ്റാന്വേഷണം മെച്ചപ്പെടുത്തുന്നതിന് സാങ്കേതികവിദ്യയുടെ പങ്ക്, തീവ്രവാദപ്രവര്‍ത്തനങ്ങളും മൗലികവാദ പ്രവര്‍ത്തനങ്ങളും തടയുന്നതിന് ശാസ്ത്രസാങ്കേതിക വിദ്യകളുടെ ഉപയോഗം, ജനക്കൂട്ടത്തെ നിയന്ത്രിക്കുന്നതിന് അപായരഹിതമാര്‍ഗങ്ങള്‍, റോഡപകടങ്ങളിലെ മരണനിരക്ക് കുറയ്ക്കുന്നതിനുള്ള ഗതാഗത മാനേജ്‌മെന്റ് തുടങ്ങിയ സെഷനുകളും നൂതനാശയങ്ങള്‍ പങ്കുവയ്ക്കുന്ന ഓപ്പണ്‍ഹൗസും നടക്കും.
കോവളം കെ.ടി.ഡി.സി സമുദ്രയില്‍ ഇന്നു രാവിലെ 11ന് മുഖ്യമന്ത്രി പിണറായി വിജയന്‍ കോണ്‍ഗ്രസ് ഉദ്ഘാടനം ചെയ്യും. എം. വിന്‍സന്റ് എം.എല്‍.എ  അധ്യക്ഷനാകും. ബി.പി.ആര്‍ ആന്‍ഡ് ഡി ഡയരക്ടര്‍ ജനറല്‍ എം.സി ബോര്‍വാന്‍കര്‍ ആമുഖ പ്രഭാഷണം നടത്തും. ആഭ്യന്തരവകുപ്പ് അഡീഷനല്‍ ചീഫ് സെക്രട്ടറി നളിനി നെറ്റോ, രാജീവ്ഗാന്ധി ബയോടെക്‌നോളജി ഡയറക്ടര്‍ പ്രൊഫ.എം. രാധാകൃഷ്ണപിള്ള സംസാരിക്കും.
സംസ്ഥാന പൊലിസ് മേധാവി ലോക്‌നാഥ് ബെഹ്‌റ സ്വാഗതവും എ.ഡി.ജി.പി ഡോ.ബി. സന്ധ്യ നന്ദിയും പറയും. നാളെ വൈകിട്ട് മൂന്നിന് സമാപനസമ്മേളനം കേരള ഗവര്‍ണര്‍ പി. സദാശിവം ഉദ്ഘാടനം ചെയ്യും. ബി.പി.ആര്‍ ആന്‍ഡ് ഡി ഡയരക്ടര്‍ ജനറല്‍ എം.സി ബോര്‍വാന്‍കര്‍ അധ്യക്ഷനാകും.