ഉപ്പള: ഭഗവതി നഗറില്‍ ഉണ്ടായ മൂന്നു വാഹനങ്ങള്‍ കൂട്ടിമുട്ടിയുണ്ടായ അപകടത്തില്‍ നാലു പേര്‍ക്ക് പരുക്ക്. അപകടത്തില്‍ രണ്ടു വയസുകാരി അത്ഭുതകരമായി രക്ഷപ്പെട്ടു. ഇന്നലെ വൈകുന്നേരം നാലോടെ ദേശീയപാതയിലാണ് അപകടം നടന്നത്. കാസര്‍കോടു നിന്നും മംഗളൂരുവിലേക്ക് പോവുകയായിരുന്ന സ്വിഫ്റ്റ് കാറും മംഗളൂരുവില്‍ നിന്നും ഉപ്പളയിലേക്ക് വരികയായിരുന്ന ടവേര കാറും കൂട്ടിയിടിക്കുകയായിരുന്നു.മറ്റൊരു വാഹനത്തെ മറികടക്കാന്‍ ശ്രമിക്കവേ സ്വിഫ്റ്റ് കാര്‍ ഡ്രൈവര്‍ കാണിച്ച ശ്രദ്ധക്കുറവാണ് അപകടത്തിന് ഇടയാക്കിയതെന്നു നാട്ടുകാര്‍ പറഞ്ഞു. അപകടത്തില്‍ സ്വിഫ്റ്റ് കാര്‍ ഡ്രൈവര്‍ ആരിക്കാടി സ്വദേശി മുഹമ്മദ്(52 ) ഓംനിയില്‍ ഉണ്ടായിരുന്ന കര്‍ണാടക ഉള്ളാള്‍ സ്വദേശികള്‍ എന്നിവര്‍ക്കാണ് പരുക്കേറ്റത്. ഇവരെ ഉപ്പളയില്‍ സ്വകാര്യ ആശുപത്രിയില്‍ പ്രവേശിപ്പിച്ചു.