ബഷീര്‍ മാടാല

ഇംഫാല്‍: പ്രധാനമന്ത്രി നരേന്ദ്രമോദി ഏകാധിപതിയെന്ന് മണിപ്പൂര്‍ സമരനായിക ഇറോം ഷര്‍മിള. രാജ്യം നേരിടുന്ന നോട്ടുപ്രതിസന്ധിയെക്കുറിച്ച് ഇംഫാലിലെ ഓഫിസില്‍ 'സുപ്രഭാത'ത്തോട് സംസാരിക്കുകയായിരുന്നു അവര്‍. സാമ്പത്തിക അടിയന്തരാവസ്ഥ സൃഷ്ടിച്ച് ജനങ്ങളെ ആശങ്കപ്പെടുത്തിയതിനുപുറമെ എല്ലാവരെയും ബാങ്കുകള്‍ക്കുമുന്നില്‍ തളച്ചിട്ടിരിക്കുകയാണ് മോദി.
വിദഗ്ധരുമായി കൂടിയാലോചിക്കാതെ ഏകാധിപത്യ സ്വഭാവത്തോടെ ഒറ്റ രാത്രികൊണ്ടെടുത്ത തീരുമാനം വന്‍ സാമ്പത്തിക പ്രതിസന്ധിയാണ് രാജ്യത്ത് ഉണ്ടാക്കിയിട്ടുള്ളത്. മണിപ്പൂര്‍ പോലുള്ള സംസ്ഥാനങ്ങളില്‍ കൊടുംതണുപ്പായിട്ടും പുലര്‍ച്ചെ മുതല്‍ ബാങ്കുകള്‍ക്കുമുന്നില്‍ നീണ്ട ക്യൂ ആണ്.
ചെറുകിട കച്ചവടക്കാരെയാണ് നോട്ട് പിന്‍വലിക്കല്‍ ഏറ്റവും കൂടുതല്‍ ബാധിച്ചിരിക്കുന്നത്. സ്ത്രീകളുടെ മാര്‍ക്കറ്റായ മണിപ്പൂരിലെ ഇമാ മാര്‍ക്കറ്റില്‍ കച്ചവടക്കാര്‍ കടുത്ത പട്ടിണിയിലാണ്.
ജനാധിപത്യസംവിധാനത്തില്‍ കേട്ടുകേള്‍വിപോലുമില്ലാത്ത മോദിയുടെ ഇത്തരം നീക്കങ്ങളെ സര്‍ജിക്കല്‍ സ്‌ട്രൈക്ക് എന്നല്ല മറ്റെന്തെങ്കിലും പേരിട്ടാണ് വിളിക്കേണ്ടതെന്നും ഷര്‍മിള വ്യക്തമാക്കി. നീണ്ട 16 വര്‍ഷത്തെ നിരാഹാരസമരം അവസാനിപ്പിച്ച് പുതിയ രാഷ്ട്രീയപ്പാര്‍ട്ടി രൂപീകരിച്ച് സജീവ രാഷ്ട്രീയത്തില്‍ പ്രവേശിച്ചിരിക്കുകയാണ് ഷര്‍മിള.
മണിപ്പൂരിലെ കോണ്‍ഗ്രസ്, ബി.ജെ.പി മുന്നണികള്‍ക്കെതിരേ സജീവമായി രംഗത്തുള്ള ഇവരുടെ പാര്‍ട്ടി നോട്ടുപ്രതിസന്ധി പ്രധാന ചര്‍ച്ചാവിഷയമാക്കിയിട്ടുണ്ട്.