തിരുവനന്തപുരം: കഴിഞ്ഞ സര്‍ക്കാരിന്റെ കാലത്ത് കണ്‍സ്യൂമര്‍ഫെഡില്‍ നടന്ന അഴിമതികളുമായി ബന്ധപ്പെട്ട് രജിസ്റ്റര്‍ ചെയ്ത കേസുകള്‍ അന്വേഷിക്കുന്നതിനു മാത്രമായി വിജിലന്‍സിന്റെ പ്രത്യേക യൂനിറ്റ് രൂപീകരിക്കുന്നു. വിജിലന്‍സ് ഡയറക്ടര്‍ ജേക്കബ് തോമസിന്റെ ഈ നിര്‍ദേശത്തിനു സര്‍ക്കാര്‍ തത്വത്തില്‍ അംഗീകാരം നല്‍കിയതായാണ് സൂചന.
കഴിഞ്ഞ നാലുവര്‍ഷത്തിനിടെ കണ്‍സ്യൂമര്‍ഫെഡിന്റെ പ്രവര്‍ത്തനവുമായി ബന്ധപ്പെട്ട് 34 കേസുകളാണ് രജിസ്റ്റര്‍ ചെയ്തത്. ഇതില്‍ പ്രതിചേര്‍ക്കപ്പെട്ടവരില്‍ മുന്‍ ചീഫ് മാനേജര്‍ ജയകുമാറിനും റീജണല്‍ മാനേജര്‍ സ്വിഷ് സുകുമാരനും എതിരെ മാത്രമാണ് വകുപ്പുതല നടപടി ഉണ്ടായത്. ബാക്കി ഉദ്യോഗസ്ഥരെല്ലാം ഇപ്പോഴും ഉന്നത സ്ഥാനങ്ങളില്‍ തുടരുന്നുണ്ട്.
ഓപ്പറേഷന്‍ അന്നപൂര്‍ണ എന്നപേരില്‍ കണ്‍സ്യൂമര്‍ഫെഡ് അഴിമതിയുമായി ബന്ധപ്പെട്ട് നടത്തിയ പരിശോധനയില്‍ രജിസ്റ്റര്‍ ചെയ്ത കേസുകളിലും മൂന്നുവര്‍ഷമായി  നടപടിയുണ്ടായിട്ടില്ല. ഇതിനുപുറമേ കണ്‍സ്യൂമര്‍ഫെഡിലെ കമ്പ്യൂട്ടര്‍വത്കരണം, നീതി, നന്മ സ്റ്റോറുകളിലെ അഴിമതി എന്നിവസംബന്ധിച്ച പതിനഞ്ചോളം കേസുകളും വിജിലന്‍സിന്റെ അന്വേഷണപരിധിയിലാണ്.
നിലവില്‍ ഒരു വകുപ്പുമായി ബന്ധപ്പെട്ട് വിജിലന്‍സ് രജിസ്റ്റര്‍ ചെയ്ത കേസുകള്‍ ഏറ്റവും കൂടുതലുള്ളത് കണ്‍സ്യൂമര്‍ഫെഡിലാണ്. ഇതില്‍ ഇരുപതെണ്ണം ജേക്കബ് തോമസ് വിജിലന്‍സ് ഡയറക്ടറായശേഷം രജിസ്റ്റര്‍ ചെയ്തതാണ്. നിലവില്‍ തിരുവനന്തപുരം കേന്ദ്രമാക്കിയാണ് വിജിലന്‍സിന്റെ രണ്ട് സ്‌പെഷ്യല്‍ യൂനിറ്റുകളും പ്രവര്‍ത്തിക്കുന്നത്.
ഇതുമൂലം മധ്യകേരളത്തിലെയും വടക്കന്‍ കേരളത്തിലെയും കേസുകള്‍ അന്വേഷിക്കാന്‍ വിജിലന്‍സ് പ്രായോഗിക ബുദ്ധിമുട്ട് നേരിടുന്നുണ്ടെന്ന് ജേക്കബ് തോമസ് സര്‍ക്കാരിനെ അറിയിച്ചിട്ടുണ്ട്. ഈ സാഹചര്യത്തിലാണ് കണ്‍സ്യൂമര്‍ഫെഡ് അഴിമതി അന്വേഷിക്കുന്നതിനുമാത്രമായി പ്രത്യേക യൂനിറ്റ് എന്ന വിജിലന്‍സിന്റെ ആവശ്യം സര്‍ക്കാര്‍ അംഗീകരിച്ചത്.