പാലക്കാട്: സംസ്ഥാന യുവജനക്ഷേമ ബോര്‍ഡും ജില്ലാ പഞ്ചായത്തും ചേര്‍ന്ന് നടത്തുന്ന ജില്ലാ കേരളോത്സവത്തിന് ഇന്ന് മലമ്പുഴയില്‍ തുടക്കമാവും. മലമ്പുഴ പഞ്ചായത്ത് കമ്മ്യൂനിറ്റി ഹാളില്‍ കെ.ഡി.പ്രസേനന്‍ എം.എല്‍.എ കേരളോത്സവം ഉദ്ഘാടനം ചെയ്യും.
ഗ്രാമീണരായ യുവാക്കളുടെ കലാ-കായിക മികവുകളെ പ്രോത്സാഹിപ്പിക്കുന്നതിനായാണ് കേരളോത്സവം നടത്തുന്നത്. ജില്ലാ പഞ്ചായത്തിന്റെ നേതൃത്വത്തില്‍ മലമ്പുഴ ബ്ലോക്കില്‍ ഡിസംബര്‍ 20 വരെ നടക്കുന്ന കേരളോത്സവത്തില്‍ ഗ്രാമ-ബ്ലോക്ക് പഞ്ചായത്ത്തലങ്ങളില്‍ പങ്കെടുത്ത് വിജയിച്ചവരാണ് മത്സരിക്കുക.
മലമ്പുഴ പഞ്ചായത്ത് ഹാളിലും മലമ്പുഴ ഐ.ടി.ഐയിലുമായി സജ്ജീകരിച്ച ആറ് വേദികളില്‍ ഇന്നും നാളെയുമായി 37 ഇനം കലാമത്സരങ്ങള്‍ നടക്കും. 13 ഇന കായിക മത്സരങ്ങള്‍ക്ക് നാളെ തുടക്കമാവും. മുട്ടിക്കുളങ്ങര കെ.എ.പി. ഗ്രൗണ്ട്, മുട്ടിക്കുളങ്ങര കെ.എ.പി (രണ്ട്)ബറ്റാലിയന്‍ ഗ്രൗണ്ട്, റെയില്‍വെ ഇന്‍സ്റ്റിറ്റ്യൂട്ട്, യുവക്ഷേത്ര ഗ്രൗണ്ട് മുണ്ടൂര്‍, നെന്മാറ ക്ഷേത്രക്കുളം, പാലക്കാട് ഇന്‍ഡോര്‍ സ്റ്റേഡിയം, സി.ബി.കെ.എം ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളിലായാണ് മത്സരങ്ങള്‍ നടക്കുക. ഉദ്ഘാടന പരിപാടിയില്‍ ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി അധ്യക്ഷയാവും. സാഹിത്യകാരന്‍ മുണ്ടൂര്‍ സേതുമാധവന്‍, മലമ്പുഴ ബ്ലോക്ക് പഞ്ചായത്ത് പ്രസിഡന്റ് കെ.പി.ഷൈജ, ജില്ലാ യൂത്ത് കോഡിനേറ്റര്‍ പി.എം.ശശി, ജില്ലാ പഞ്ചായത്ത് സ്റ്റാന്‍ഡിങ് കമ്മിറ്റി അംഗങ്ങള്‍ , മലമ്പുഴ ഗ്രാമ പഞ്ചായത്ത് പ്രസിഡന്റ് ഇന്ദിരാ രാമചന്ദ്രന്‍ പങ്കെടുക്കും.
കായിക മത്സരങ്ങളുടെ ഉദ്ഘാടനം 18 ന് രാവിലെ മുട്ടിക്കുളങ്ങര കെ.എ.പി. കാംപ് ഗ്രൗണ്ടില്‍ ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.എന്‍. കണ്ടമുത്തന്‍ ഉദ്ഘാടനം ചെയ്യും. സമാപന സമ്മേളനം 20ന് വൈകിട്ട് മുട്ടിക്കുളങ്ങര കെ.എ.പി കാംപ് ഗ്രൗണ്ടില്‍ എം.ബി.രാജേഷ് എം.പി നിര്‍വഹിക്കും.