നെയ്യാറ്റിന്‍കര: സ്‌കൂള്‍ യൂനിഫോം കീറിയതിന് അഞ്ചാം ക്ലാസ് വിദ്യാര്‍ഥിയെ ഫാനില്‍ കെട്ടിത്തൂക്കിയ കേസില്‍ പിതാവിനെ കഴിഞ്ഞദിവസം പൊലീസ് അറസ്റ്റ് ചെയ്തു.
നെയ്യാറ്റിന്‍കര മാരായമുട്ടം കോട്ടയ്ക്കല്‍ കുറുവാട് വലിയവട്ടക്കുഴി മേ ലേ പുത്തന്‍വീട്ടില്‍ ബിജുകുമാറിനെ(37) ആണ് കഴിഞ്ഞദിവസം പുലര്‍ച്ചെ നെയ്യാറ്റിന്‍കര നിന്നും പൊലീസ് അറസ്റ്റ് ചെയ്തത്. കഴിഞ്ഞ 25ന് പാലിയോട് പേരാമ്പ്ര എല്‍.എം.എസ് യു.പി.എസിലെ വിദ്യാര്‍ഥിയായ ആദര്‍ശ് സ്‌കൂള്‍ കഴിഞ്ഞ് വീട്ടിലെത്തിയപ്പോള്‍ യൂണിഫോം കീറിയത് ശ്രദ്ധയില്‍പെട്ട ബിജുകുമാര്‍ കുട്ടിയെ ക്രൂര പീഡനത്തിനിരയാക്കുകയായിരുന്നു. കുട്ടിയെ മര്‍ദ്ദിച്ച ശേഷം കഴുത്തിലും കാലിലും കയര്‍ ചുറ്റിക്കെട്ടി സീലീങ് ഫാനില്‍ കെട്ടിത്തൂക്കുകയായിരുന്നു. അതിനു ശേഷം ഫാനിന്റെ സ്വിച്ച് ഓണ്‍ ചെയ്യുകയായിരുന്നു. കുട്ടി നിലവിളിച്ചപ്പോള്‍ അഴിച്ച് താഴെയിറക്കി വീണ്ടും മര്‍ദ്ദിക്കുകയായിരുന്നു.
ദിവസങ്ങള്‍ക്ക് ശേഷം ആദര്‍ശ് സ്‌കൂളിലെത്തിയപ്പോള്‍ കഴുത്തില്‍ കയര്‍ വരിഞ്ഞ് മുറുക്കിയ പാട് ശ്രദ്ധയില്‍പ്പെട്ട അധ്യാപകര്‍ കാര്യം തിരക്കിയപ്പോഴാണ് സംഭവം പുറംലോകം അറിയുന്നത്. തുടര്‍ന്ന് അധ്യാപകര്‍ ചൈല്‍ഡ് ലൈന്‍ പ്രവര്‍ത്തകരെ വിവരം അറിയിക്കുകയായിരുന്നു. ഇതേതുടര്‍ന്ന് മാരായമുട്ടം പൊലീസ് മൊഴിയെടുത്ത ശേഷം കുട്ടിയെ ചൈല്‍ഡ് ലൈന്‍ പ്രവര്‍ത്തകര്‍ക്ക് കൈമാറുകയായിരുന്നു.
പൊലീസ് അറസ്റ്റ് ചെയ്ത ബിജുകുമാറിനെ ഇന്നലെ കോടതിയില്‍ ഹാജരാക്കി റിമാന്റ് ചെയ്തു.