കൊല്ലം: ചിഗര്‍മൈറ്റ് എന്നറിയപ്പെടുന്ന ചെറിയ ഇനം ചെള്ളുകളുടെ കടിയേറ്റ് ഉണ്ടാകുന്ന ചെള്ള് പനി അഥവാ സ്‌ക്രബ് ടൈഫസ് എന്ന രോഗത്തിനെതിരേ ജാഗ്രത പുലര്‍ത്തണമെന്ന് ജില്ലാ മെഡിക്കല്‍ ഓഫീസര്‍ ഡോ. വി.വി ഷേര്‍ളി അറിയിച്ചു.
പുല്ലും പുല്‍ച്ചെടികളും വെട്ടുന്നവര്‍ക്കും പുല്‍ത്തകിടികളില്‍ ഇരിക്കുന്നവര്‍ക്കും ഇത്തരം ചെള്ളുകടിയേല്‍ക്കാന്‍ സാധ്യതയുണ്ട്. കൂടാതെ ഇത്തരം പ്രദേശങ്ങളില്‍ ഇടപെഴുകുന്ന എലി, അണ്ണാന്‍, മുയല്‍ തുടങ്ങിയവയുട ശരീരത്തില്‍ ചെള്ളുകള്‍ പ്രവേശിക്കുന്നതിനും അവയിലൂടെ മനുഷ്യര്‍ക്ക് രോഗബാധ ഉണ്ടാകുവാനും സാധ്യതയുണ്ട്. ചിഗര്‍മൈറ്റുകളുടെ കടിയേറ്റ് 10 മുതല്‍ 12 ദിവസങ്ങള്‍ കഴിയുമ്പോഴാണ് രോഗലക്ഷണങ്ങള്‍ കാണപ്പെടുന്നത്.
കടിയേറ്റ ഭാഗത്ത് ചുവന്ന് തടിച്ച പാടുകളും ഉണ്ടാകും. കക്ഷം, തുട, അടിവയര്‍ ചേരുന്ന ഭാഗം, അരക്കെട്ട്, ജനനേന്ദ്രീയങ്ങള്‍, കഴുത്ത് തുടങ്ങിയ ഭാഗങ്ങളില്‍ ഇത്തരം പാടുകള്‍ ഉണ്ടാകും. ഇവ പിന്നീട് വൃണമായി മാറും. വിറയലോട് കൂടിയ പനി, തലവേദന, കണ്ണിന് ചുവപ്പ്, കഴലവീക്കം, പേശി വേദന, ചുമ, ന്യൂമോണിയ എന്നിവയാണ് രോഗലക്ഷണങ്ങള്‍. തലച്ചോറിനെ ബാധിക്കുന്ന അവസ്ഥയുണ്ടായാല്‍ മരണംവരെ സംഭവിക്കാം. വീട്ട് പരിസരത്തുള്ള പാഴ്‌ച്ചെടികള്‍ വെട്ടി വൃത്തിയാക്കുക, പുല്‍ത്തകിടിയുമായി അടുത്തിടപഴകുന്നവര്‍ ചെള്ള് കടിയേല്‍ക്കാത്ത രീതിയിലുള്ള വസ്ത്രം ധരിക്കുക, ഇത്തരം സ്ഥലങ്ങളില്‍ തുണി ഉണക്കാതിരിക്കുക എന്നിവയാണ് പ്രതിരോധ മാര്‍ഗങ്ങള്‍. രോഗലക്ഷണം കണ്ടാല്‍ ഉടന്‍ അടുത്തുള്ള ആരോഗ്യ കേന്ദ്രങ്ങളില്‍ ചികിത്സ തേടണം. രോഗ സാധ്യതയുള്ള സ്ഥലങ്ങളില്‍ ജോലിചെയ്യുന്നവര്‍ക്ക് പ്രതിരോധമായി ഡെക്‌സിസൈക്ലിന്‍ ഗുളിക ആരോഗ്യ കേന്ദ്രങ്ങളില്‍ ലഭിക്കുമെന്നും ഡി.എം.ഒ അറിയിച്ചു.