കൊച്ചി: 180ലധികം പി.എസ്.സി റാങ്ക് പട്ടികകളുടെ കാലാവധി ഡിസംബറില്‍ അവസാനിക്കാനിരിക്കെ റാങ്ക് ലിസ്റ്റുകളുടെ കാലാവധി ഒരു വര്‍ഷം കൂടി നീട്ടണമെന്ന് സംസ്ഥാന മനുഷ്യാവകാശ കമ്മിഷന്‍. ഒഴിവുള്ള തസ്തികകളില്‍ അടിയന്തരമായി നിയമനം നടത്തണമെന്നും കമ്മിഷന്‍ ആക്റ്റിങ് ചെയര്‍പേഴ്‌സണ്‍ പി മോഹനദാസ് ആവശ്യപ്പെട്ടു. വിഷയത്തില്‍ ചീഫ് സെക്രട്ടറിയും പി.എസ്.സി സെക്രട്ടറിയും ഒരു മാസത്തിനകം വിശദീകരണം നല്‍കണം. കേസ് എറണാകുളത്ത് നടക്കുന്ന സിറ്റിങില്‍ പരിഗണിക്കും.
കമ്മിഷന്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി. നിയമനം നടത്താന്‍ സര്‍ക്കാരിന്റെ ഭാഗത്ത് നിന്നും കാലതാമസമുണ്ടാകുന്നതിനാല്‍ യോഗ്യതയുള്ളവര്‍ അവഗണിക്കപ്പെടുന്നതായി നടപടിക്രമത്തില്‍ പറയുന്നു. പുതിയ റാങ്ക് ലിസ്റ്റ് തയ്യാറാക്കാന്‍ രണ്ടു വര്‍ഷമെങ്കിലുമെടുക്കുമെന്നും കമ്മിഷന്‍ നിരീക്ഷിച്ചു.