ജിദ്ദ: സഊദി സാങ്കേതിക പരിശീലന കേന്ദ്രം 19000 സഊദി യുവതീ യുവാക്കള്‍ മൊബൈല്‍ ഫോണ്‍ മേഖലയില്‍ ജോലി ചെയ്യാനായി സജ്ജരാകിയതായി സഊദി തൊഴില്‍ മന്ത്രാലയം.


ഈ റംസാനോടെ മൊബൈല്‍ വിപണന, അറ്റകുറ്റപണി മേഖലയില്‍ സഊദി വത്ക്കരണത്തിന്റെ ഒന്നാം ഘട്ടം പൂര്‍ത്തീകരിക്കാനിരിക്കെയാണു മന്ത്രാലയത്തിന്റെ അറിയിപ്പ്. ഒന്നാം ഘട്ടത്തില്‍ 50 ശതമാനം സഊദിവത്ക്കരണം നിര്‍ബന്ധമായും നടപ്പാക്കണമെന്നാണു തൊഴില്‍ മന്ത്രാലയം നിര്‍ദ്ദേശിച്ചിട്ടുള്ളത്.


7154 പേര്‍ ബേസിക് മെയിന്റനന്‍സ് ട്രെയിനിങ് കഴിഞ്ഞ് മേഖലയിലേക്ക് ഇറങ്ങാന്‍ റെഡിയായി നില്‍ക്കുമ്പോള്‍ 6228 പേര്‍ കസ്റ്റമര്‍ കെയര്‍ സര്‍വീസ് ട്രെയിനിങും 5702 പേര്‍ സെയില്‍സ് സ്‌കില്‍ ട്രെയിനിങും കഴിഞ്ഞ് ജോലി ചെയ്യാന്‍ സജരായിട്ടുണ്ടെന്നും അറിയിച്ചു.


ഹ്യൂമന്‍ റിസോഴ്‌സ് ഡവലപ്‌മെന്റ് ഫണ്ട് വഴി നടത്തിയ ട്രെയിനിങ് പ്രോഗ്രാമിനു സഊദി യുവതീ യുവാക്കളില്‍ നിന്നും ആശാവഹമായ പ്രതികരണമാണു ലഭിച്ചത്. 76000 ത്തോളം സഊദി യുവതി യുവാക്കള്‍ മൊബൈല്‍ ഫോണ്‍ മേഖലയില്‍ ജോലി ചെയ്യുന്നതിനു സജ്ജരായി ഹ്യൂമന്‍ റിസോഴ്‌സ് ഡവലപ്‌മെന്റ് ഫണ്ടിന്റെ വെബ്‌സൈറ്റില്‍ രജിസ്റ്റര്‍ ചെയ്തിട്ടുണ്ട്.


ഇവര്‍ക്ക് ടെലിമേഖലയിലോ അല്ലെങ്കില്‍ റിയാദിലെ നാഷണല്‍ സംരംഭ കേന്ദ്രത്തിന്റെ പിന്തുണയോടെ സ്വന്തമായി സംരഭങ്ങള്‍ തുടങ്ങാണും സര്‍്ക്കാര്‍ സഹായം നല്‍കും. ഇതോടെ സ്വദേശികളുടെ തൊഴില്‍ അവസരം വര്‍ധിപ്പിക്കുമെന്നും തൊഴില്‍ മന്ത്രാലയ വൃത്തങ്ങളുടെ കണക്കുകൂട്ടല്‍.

ആകെ ഇരുപതിനായിരം സ്വദേശികളെയാണ് പരീശനത്തിന് ലക്ഷ്യമിടുന്നത്. സെപ്തംബര്‍ രണ്ടിനകം മൊബൈല്‍ ഫോണ്‍ മേഖല  പരിപൂര്‍ണ സഊദിവത്ക്കരണത്തിനാണ് തൊഴില്‍ മന്ത്രാലയത്തിന്റെ ലക്ഷ്യം.