റിയാദ്: സഊദി സന്ദര്‍ശന വിസ പുതുക്കുന്നതിന് ഇന്‍ഷുറന്‍സ് കാലാവധി ഉണ്ടായിരിക്കണമെന്ന പുതിയ വ്യവസ്ഥ നിലവില്‍ വന്നു. വിസിറ്റ് വിസ പുതുക്കുന്നതിന് ഇന്‍ഷുറന്‍സ് പുതുക്കല്‍ നിര്‍ബന്ധമാക്കുന്ന പദ്ധതി പാസ്‌പോര്‍ട്ട് വിഭാഗം ( ജാവാസാത് ) മായി സഹകരിച്ച് നടപ്പാക്കുന്നതിന് വേണ്ട ക്രമീകരണങ്ങള്‍ പൂര്‍ത്തിയായതായി കൗണ്‍സില്‍ ഓഫ് കോ ഓപറേറ്റീവ് ഹെല്‍ത്ത് ഇഷ്യുറന്‍സ് വ്യക്തമാക്കി. ഇതോടെ കുടുംബ സന്ദര്‍ശക വിസകളില്‍ ബന്ധുക്കളെ കൊണ്ടുവരുന്നവര്‍ക്ക് വീണ്ടും ചിലവേറും.

ഇതിന്റെ ഭാഗമായി സന്ദര്‍ശന വിസകള്‍ ആരോഗ്യ ഇന്‍ഷ്യുറന്‍സുമായി ബന്ധപ്പെടുത്തുന്ന നടപടികളുടെ പ്രാരംഭ ഘട്ടം പൂര്‍ത്തിയായിട്ടുണ്ട്. ഇന്‍ഷുറന്‍സ് കൗണ്‍സിലും സഊദി ജവാസാത്തും ഓണ്‍ലൈനുമായി ബന്ധപ്പെടുത്തിയിട്ടുണ്ട്. രാജ്യത്തെത്തുന്ന മുഴുവന്‍ സന്ദര്‍ശന വിസക്കാര്‍ക്കും ആരോഗ്യ പരിരക്ഷ നല്‍കുന്ന ഇന്‍ഷുറന്‍സ് നിര്‍ബന്ധമാക്കുന്നതിന് മന്ത്രിസഭ നേരത്തെ തീരുമാനിച്ചിരുന്നു.

നവംബര്‍ 13 മുതല്‍ ലഭിച്ച എല്ലാ സന്ദര്‍ശന വിസക്കുമാണ് നിയമം ബാധകം. ഈ തിയതി മുതല്‍ എടുത്ത വിസകള്‍ പുതുക്കുന്നതിന് ഇന്‍ഷുറന്‍സ് ഉറപ്പു വരുത്തണമെന്ന് ഇന്‍ഷുറന്‍സ് കൗണ്‍സില്‍ മേധാവി ജനറല്‍ മുഹമ്മദ് അല്‍ ഹുസൈന്‍ വ്യക്തമാക്കി. ഇന്‍ഷുറന്‍സ് ഇല്ലാതെ ഒരു കാരണവശാലും വിസ പുതുക്കുന്നതിന് സാധ്യമല്ലെന്നും അദ്ദേഹം പറഞ്ഞു.

സന്ദര്‍ശന വിസകളിലെത്തുന്നവര്‍ക്ക് ആശുപത്രികളില്‍ കിടത്തി ചികിത്സ, നഴ്‌സിംഗ് സേവനം, ഭക്ഷണം എന്നിവക്കു പുറമെ ദിനേന 600 റിയാല്‍ വരെയുള്ള മരുന്നുകളും മറ്റു ആരോഗ്യ രംഗത്തെ സേവനങ്ങളും ലഭ്യമാകും.പരമാവധി ഒരു ലക്ഷം റിയാല്‍ വരെയുള്ള കവറേജാണ് സന്ദര്‍ശക വിസക്കാര്‍ക്ക് ലഭ്യമാവുക.

അതേസമയം, ഹജ് ഉംറ തീര്‍ത്ഥാടകര്‍, നയതന്ത്ര ഉദ്യോഗസ്ഥര്‍, നയതന്ത്ര കാര്യാലയങ്ങളും അന്താരാഷ്ട സംഘടനകളുടെ ആസ്ഥാനങ്ങളും സന്ദര്‍ശിക്കാനെത്തുന്നവര്‍, സര്‍ക്കാര്‍ അതിഥികള്‍ എന്നിവര്‍ക്ക് ഇന്‍ഷുറന്‍സ് പോളിസി നിര്‍ബന്ധമാക്കിയിട്ടില്ല.