ചിറ്റൂര്‍: കാലവര്‍ഷം കൈവിട്ടതോടെ കൊല്ലങ്കോട് ബ്ലോക്കിലെ 2500 ഏക്കറിലധികം കൃഷിഭൂമി തരിശ്ശായി. ഡാമുകളിലെ ജലവിതരണ പിഴവും, മഴക്കുറവും നെല്‍കര്‍ഷകരുടെ സമയനിഷ്ടയിലുള്ള കൃഷിയിറക്കാന്‍ അസാധ്യമാക്കി. തണ്ണീര്‍ത്തട നീര്‍ത്തട സംരക്ഷണവും നിയമങ്ങളില്‍ മാത്രം പാലിക്കപ്പെടുന്നതും ഗ്രാമങ്ങളിലെ ജലസ്രോതസുകളെ അപ്പാടെ നശിപ്പിച്ചു. ജലസ്രോതസുകള്‍ സംരക്ഷിക്കാനും നാട് മാലിന്യമുക്തമാക്കാനും കാര്‍ഷിക സംസ്‌കൃതി വീണ്ടെടുക്കാനുമുള്ള പദ്ധതികള്‍ പലതുണ്ടെങ്കിലും വിജയിച്ചവ വളരെ കുറവാണ്. നെല്‍പാടങ്ങള്‍ വീണ്ടെടുക്കാനുള്ള പ്രവര്‍ത്തനങ്ങളുടെ തിരക്കേറിയ സമയത്താണ് കാലവര്‍ഷം ചതിച്ചത്.
കേരളത്തിലെ കൃഷി മഴക്കാലം,ശീതകാലം,വേനല്‍കാലം, എന്നിങ്ങനെ മൂന്ന് ഘട്ടങ്ങളായി ചെയ്യാറുണ്ടെങ്കിലും ഇത്തവണ ഒന്നും തന്നെ നടപ്പിലാക്കാന്‍ സാധ്യമായിട്ടില്ല. വെള്ളക്കെട്ടും അതിവര്‍ഷവും മൂലം ഏറ്റവും ശ്രമകരമായി ചെയ്യുന്ന മഴക്കാല കൃഷിതന്നെ ഇല്ലാതായി. ജില്ലാതല കാര്‍ഷിക സമിതി നെല്‍കൃഷിതന്നെ ഉപേക്ഷിക്കാനും പയര്‍ വര്‍ഗ്ഗവിളകളുടെ വിത്തുകള്‍ സൗജന്യമായി നല്‍കാമെന്ന് പറഞ്ഞെങ്കിലും ഒന്നും നടന്നില്ല.
ഒന്നാംവിളയുടെ സപ്ലൈക്കോയിലൂടെ നെല്ല് സംഭരിച്ചതിന്റെ സംഭരണവില കര്‍ഷകര്‍ക്ക് ലഭിക്കാത്തതും കൃഷിയിറക്കാന്‍ തടസ്സമായി. പറമ്പിക്കുളം ആളിയാര്‍ കരാറുപ്രകാരം കേരളത്തിന് അവകാശപ്പെട്ടജലവും ഇത്തവണ ലഭിച്ചില്ല. ആയതിനാല്‍ പട്ടഞ്ചേരി പഞ്ചായത്തില്‍ മാത്രം 700 ഏക്കര്‍ നെല്‍വയലാണ് ഇത്തവണ തരിശ്ശിട്ടിരിക്കുന്നത്.
ശൈത്യകാല പച്ചക്കറിയിലേക്ക് ഇറങ്ങിയ കര്‍ഷകര്‍ക്കാവട്ടെ വേനലിന്റെ കാഠിന്യത്തില്‍ കൃഷിനാശവും സംഭവിക്കുന്നു. .കേരളത്തിലെ പച്ചക്കറി ഉപഭോഗത്തിന്റെ 20% ത്തിലേറെയും മണ്ഡലകാലം മുതല്‍ മകരവിളക്ക് വരെയുള്ള നവംബര്‍ ഡിസംബര്‍ മാസങ്ങളിലാണ്. ഇത് കണക്കിലെടുത്തുകൊണ്ട് സര്‍ക്കാര്‍ സഹായത്തോടെ തുടര്‍കൃഷി സംഘടിപ്പിക്കാനുംഈ പശ്ചാത്തലത്തില്‍ കാമ്പയിനു പകരം ഇന്നിപ്പോള്‍ കൃഷി ചെയ്യുന്നവരെ ആ രംഗത്ത് നിലനിര്‍ത്താനും പരമ്പരാഗത കൃഷിക്കാരെ കൂടുതല്‍ അടുപ്പിക്കാനുമുള്ള നടപടികളാണ് ഉണ്ടാവേണ്ടത്.