വാഷിങ്ടണ്‍: അഫ്ഗാന്‍ താലിബാന്‍ നേതാവ് മുല്ലാ അക്തര്‍ മന്‍സൂര്‍ കൊല്ലപ്പെട്ടതായി അമേരിക്കന്‍ പ്രസിഡന്റ് ബരാക് ഒബാമയുടെ സ്ഥിരീകരണം. കഴിഞ്ഞ ദിവസം പാകിസ്താനില്‍ അമേരിക്ക നടത്തിയ വ്യോമാക്രമണത്തിലാണ് മുല്ലാ അക്തര്‍ കൊല്ലപ്പെട്ടത്. സംഭവത്തെ പ്രധാന നാഴികക്കല്ലെന്നാണ് ഒബാമ വിശേഷിപ്പിച്ചത്.
അമേരിക്കക്കും സഖ്യസേനയ്ക്കുമെതിരേ ആക്രമണം തുടരുന്ന സംഘത്തിന്റെ നേതാവിനെ ഞങ്ങള്‍ ഇല്ലാതാക്കിയെന്ന് അദ്ദേഹം പറഞ്ഞു. മുല്ലാ അക്തര്‍ കൊല്ലപ്പെട്ടതായി നേരത്തേ അഫ്ഗാനും അറിയിച്ചിരുന്നു. എന്നാല്‍, വിഷയത്തില്‍ താലിബാന്‍ ഇതുവരെ പ്രതികരിച്ചിട്ടില്ല. പാക് പ്രദേശത്ത് ഇത്തരത്തില്‍ ആക്രമണം നടന്നുവെന്ന വാര്‍ത്ത പാകിസ്താന്‍ നിഷേധിച്ചിരുന്നു.

ആക്രമണം കടന്നുകയറ്റം: പാകിസ്താന്‍

ഇസ്‌ലാമാബാദ്: പാകിസ്താനില്‍ വ്യോമാക്രമണം നടത്തി താലിബാന്‍ നേതാവ് മുല്ലാ അക്തറിനെ വധിച്ചതായി അമേരിക്ക സ്ഥിരീകരിച്ചതിനു പിറകേ സംഭവത്തില്‍ പ്രതിഷേധവുമായി പാകിസ്താന്‍ രംഗത്ത്.
തങ്ങളുടെ രാജ്യത്തുകയറി ആക്രമണം നടത്തിയത് രാജ്യത്തിന്റെ പരമാധികാരത്തിന്മേലുള്ള കടന്നുകയറ്റമാണെന്നു പാകിസ്താന്‍ പ്രധാനമന്ത്രി നവാസ് ഷരീഫ് പറഞ്ഞു.
മുല്ലാ അക്തര്‍ പാകിസ്താനില്‍ കൊല്ലപ്പെട്ടെന്ന വാര്‍ത്ത വിശ്വാസയോഗ്യമല്ലെന്നും സംഭവത്തിന്റെ വിശദാംശങ്ങള്‍ പരിശോധിച്ചുവരികയാണെന്നും അദ്ദേഹം പറഞ്ഞു.