കുന്നുംകൈ: ക്രിസ്മസ് ആഘോഷത്തിനു വിവിധങ്ങളായ പരിപാടികളുമായി മലയോരം ഒരുങ്ങി. മലയോരത്തെ വിവിധ പ്രദേശങ്ങളിലെ ഫാന്‍സി കടകള്‍ക്കുമുന്നില്‍ വിവിധ തരം നക്ഷത്ര വിളക്കുകള്‍, പുല്‍ക്കൂട് സെറ്റുകള്‍, ഉണ്ണിയേശു ഉള്‍പ്പെടുന്ന വിവിധ രൂപങ്ങളും ഒരുങ്ങി കഴിഞ്ഞു.
ക്രിസ്തീയ ദേവാലയങ്ങളിലും ഭവനങ്ങളിലും പുല്‍കൂടുകള്‍ പണിയുന്ന തിരക്കിലാണ് വിശ്വാസികള്‍. കൂടാതെ കെ.സി.വൈ.എമ്മിന്റെ നേതൃത്വത്തില്‍ വിവിധ കലാപരിപാടികള്‍ ഇതിനോടനുബന്ധിച്ചു സംഘടിപ്പിക്കുന്നുണ്ട്.
ഐ.ബി.സി ക്ലബിന്റെ നേതൃത്വത്തില്‍ ക്രിസ്തുരാജ ഇടവകയുടെ സഹകരണത്തോടെ ക്രിസ്മസ് സന്ധ്യ സംഘടിപ്പിക്കും. ഇന്നു വൈകുന്നേരം അഞ്ചു മുതല്‍ ഭീമനടി ടൗണിലാണു പരിപാടി. പുല്‍ക്കൂട്, ക്രിസ്മസ് ട്രീ, ക്രിസ്മസ് കേക്ക് വിതരണം, നക്ഷത്രങ്ങള്‍, ദീപാലങ്കാരം, ഗാനമേള എന്നിവയുണ്ടാകും. ക്രിസ്തുരാജ ഇടവക വികാരി ഫാ. ആന്‍ഡ്രൂസ് തെക്കേല്‍ ഉദ്ഘാടനം നിര്‍വഹിക്കും. അതേസമയം കാര്‍ഷിക വിലത്തകര്‍ച്ചയും നോട്ടു പ്രതിസന്ധിയും ക്രിസ്മസ് വിപണിയെ സാരമായി ബാധിക്കുന്നുണ്ടെന്നു വ്യാപാരികള്‍ പറയുന്നു.