നെടുമ്പാശേരി: പട്ടാപ്പകല്‍ ആളില്ലാത്ത വീടിന്റെ വാതില്‍ തകര്‍ത്ത് കവര്‍ച്ചാ ശ്രമം.ദേശം സ്വര്‍ഗം റോഡില്‍ താമസിക്കുന്ന ആലുവ ഡൈനാമിക് ലിമിറ്റഡ് മുന്‍ ഡയറക്ടര്‍ പ്രശാന്തിയില്‍ ജനാര്‍ദ്ദന്റെ വീട്ടിലാണ് കവര്‍ച്ചാ ശ്രമം നടന്നത്.
കഴിഞ്ഞ ദിവസം ഉച്ചയ്ക്ക് ഒന്നിനും വൈകിട്ട് നാലിനുമിടയിലായിരുന്നു മോഷ്ടാവ് വാതില്‍ തകര്‍ത്ത് അകത്ത് കടന്നത്. ജനാര്‍ദ്ദനും കുടുംബവും  തീര്‍ത്ഥാടനത്തിനായി മഹാരാഷ്ട്രയിലാണ്. രാത്രി സെക്യൂരിറ്റിയെ ഏര്‍പ്പെടുത്തിയിട്ടുണ്ട്. തീര്‍ത്ഥാടനത്തിന് പോകുന്നതിനാല്‍ പണവും സ്വര്‍ണാഭരണങ്ങളുമെല്ലാം ബാങ്ക് ലോക്കറില്‍ സൂക്ഷിച്ചിരുന്നതിനാലാണ് വിലപ്പെട്ടതൊന്നും നഷ്ടമാകാതിരുന്നത്.
വീടിന്റെ പിന്‍വശത്തെ വാതില്‍ കുത്തിപ്പൊളിച്ച് അകത്ത് കടന്ന മോഷ്ടാക്കള്‍ അലമാരയും മേശയുമെല്ലാം തുറന്ന് പരിശോധിച്ചെങ്കിലും ഒന്നും നഷ്ടമായിട്ടില്ലെന്നാണ് പ്രാഥമീക നിഗമനം.
ഉച്ചയ്ക്ക് ഒരു മണി വരെ കാവല്‍ക്കാരന്‍ ഇവിടെയുണ്ടായിരുന്നു. ഇയാള്‍ പുറത്തേക്ക് പോയിട്ട് തിരികെയെത്തിയപ്പോഴാണ് പിന്‍ വാതില്‍ തുറന്ന നിലയില്‍ കണ്ടെത്തിയത്. നെടുമ്പാശേരി പൊലീസ് കേസെടുത്ത് അന്വേഷണം ആരംഭിച്ചു.