ചെറുതോണി: ഗവ. യു.പി സ്‌കൂളിന്റെ ഭൗതിക സൗകര്യങ്ങള്‍ വര്‍ധിപ്പിക്കുന്നതിന്റെ ഭാഗമായി ഒരുകോടി രൂപ ചെലവില്‍ പുതിയ കെട്ടിടം നിര്‍മിക്കുമെന്ന് റോഷി അഗസ്റ്റിന്‍ എം.എല്‍.എ അറിയിച്ചു. തങ്കമണി സെന്റ് തോമസ് ഹയര്‍ സെക്കന്‍ഡറി സ്‌കൂളിലെ നാഷണല്‍ സര്‍വിസ് സ്‌കീം യൂനിറ്റിന്റെ സപ്ത ദിന ക്യാംപ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇടുക്കിയിലെ മുഴുവന്‍ ഗവ. ഹയര്‍സെക്കന്‍ഡറി സ്‌കൂളുകള്‍ക്കും ബഹുനില മന്ദിരങ്ങള്‍ നിര്‍മിക്കാനായതും എല്ലാ പഞ്ചായത്തിലും ഹയര്‍സെക്കന്‍ഡറി സ്‌കൂള്‍ വിദ്യാഭ്യാസ സൗകര്യം ഉറപ്പാക്കാനായതിലൂടെയും സ്‌കൂളുകളില്‍ മികച്ച കംപ്യൂട്ടര്‍ ലാബുകളും അനുബന്ധ സജ്ജീകരണങ്ങളും പൂര്‍ത്തിയാക്കാനായതിലൂടെയും ഗവ. എയ്ഡഡ് മേഖലയിലേക്ക് കൂടുതല്‍ വിദ്യാര്‍ഥികളെ ആകര്‍ഷിക്കുന്നതിനും സഹായകമായി.
പഠനത്തോടൊപ്പം സാമൂഹിക പ്രതിബദ്ധതയും അച്ചടക്കമനോഭാവവും വാര്‍ത്തെടുക്കുന്നതിന് നാഷണല്‍ സര്‍വിസ് സ്‌കീം പോലുള്ള സംഘടനകളുടെ പ്രവര്‍ത്തനം പ്രശംസനീയമാണെന്ന് എം.എല്‍.എ പറഞ്ഞു.
ജനുവരി 1 വരെയാണ് ക്യാംപ് നടത്തുക. സ്‌കൂള്‍ ഗ്രൗണ്ട് നിര്‍മാണം, പ്ലാസ്റ്റിക് നിര്‍മ്മാര്‍ജനം, ശുചിത്വവല്‍കരണം, ആരോഗ്യബോധവല്‍കരണം, പ്രഥമ ശുശ്രൂഷ പരിശീലനം തുടങ്ങിയവയാണ് ക്യാംപിലെ പ്രധാന പരിപാടികള്‍. ഉപ്പുതോട് ഗവ. യു.പി സ്‌കൂളാണ് ക്യാംപിന് ആതിഥേയത്വം വഹിക്കുന്നത്.
ഉദ്ഘാടന ചടങ്ങില്‍ മരിയാപുരം പഞ്ചായത്ത് പ്രസിഡന്റ് ഡോളി ജോസ്, തങ്കമണി ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ കെ.എം മാത്തുക്കുട്ടി, ഉപ്പുതോട് സ്‌കൂള്‍ ഹെഡ്മിസ്ട്രസ് ബി.ടി സരസമ്മ, മരിയാപുരം പഞ്ചായത്ത് വൈസ് പ്രസിഡന്റ് സീമോന്‍ വാസു, ബ്ലോക്ക് പഞ്ചായത്തംഗം ജലജ ഷാജി, പഞ്ചായത്തംഗം തോമസുകുട്ടി ഇടശ്ശേരില്‍, സൈബിച്ചന്‍ കരിമ്പന്‍മാക്കല്‍, മനോജ് കുളപ്പുറം തുടങ്ങിയവര്‍ സംസാരിച്ചു.