കൊയിലാണ്ടി: ട്രാന്‍സ്‌ഫോര്‍മര്‍ മാറ്റിസ്ഥാപിക്കാത്തതിനാല്‍ കൊയിലാണ്ടി ബസ് സ്റ്റാന്‍ഡ് പ്രവേശന ഭാഗത്ത് അപകടസാധ്യത വര്‍ധിക്കുന്നു. പഴയ ബസ് സ്റ്റാന്‍ഡിലാണ് അപകടഭീഷണി ഉയര്‍ത്തിയും വഴിമുടക്കിയായും ട്രാന്‍സ്‌ഫോര്‍മര്‍ നിലനില്‍ക്കുന്നത്.
റവന്യു വകുപ്പിന്റെ അനുമതി ലഭിക്കാത്തതാണ് ട്രാന്‍സ്‌ഫോര്‍ മാറ്റിസ്ഥാപിക്കാന്‍ കഴിയാത്തതെന്നാണറിയുന്നത്. എസ്റ്റിമേറ്റനുസരിച്ച് കെ.എസ്.ഇ.ബിയില്‍ ഒന്നര ലക്ഷം രൂപ അടച്ചതായും റവന്യു വകുപ്പ് എന്‍.ഒ.സി നല്‍കാത്തതാണ് ട്രാന്‍സ്‌ഫോര്‍മര്‍ മാറ്റാനാകാത്തതെന്നാണ് നഗരസഭയുടെ നിലപാട്.
സമീപത്തെ മൃഗാശുപത്രിയുടെ ചുമരിനോടു ചേര്‍ന്നനിലയില്‍ ട്രാന്‍സ്‌ഫോര്‍മര്‍ മാറ്റിസ്ഥാപിക്കാനാണ് കെ.എസ്.ഇ.ബി അനുമതി തേടിയത്. ബസ് സ്റ്റാന്‍ഡിലെ പ്രവേശനഭാഗത്തുനിന്നു ട്രാന്‍സ്‌ഫോര്‍മര്‍ അടിയന്തരമായി നീക്കണമെന്ന് വ്യാപാരികളും യാത്രക്കാരും ആവശ്യപ്പെടുന്നുണ്ട്. പ്രതിദിനം ആയിരത്തിലധികം വാഹനങ്ങളാണ് ഇതുവഴി കടന്നുപോകുന്നത്.
അമിതവേഗതയിലെത്തുന്ന വാഹനങ്ങളിലൊന്ന് ട്രാന്‍സ്‌ഫോര്‍മറില്‍ വന്നിടിച്ചാല്‍ അത്യാപത്ത് സംഭവിക്കുമെന്നാണ് വ്യാപാരികളുടെയും നാട്ടുകാരുടെയും ആശങ്ക. മാത്രമല്ല, നഗരത്തിലെ ഗതാഗതക്കുരുക്കിന് ട്രാന്‍സ്‌ഫോര്‍മര്‍ പ്രധാന കാരണമാകുന്നുമുണ്ട്. ട്രാന്‍സ്‌ഫോര്‍മര്‍ മാറ്റുന്നതിന് റവന്യു വകുപ്പ് എത്രയും പെട്ടന്ന് അനുമതി നല്‍കണമെന്നാണ് ജനങ്ങളുടെ ആവശ്യം.