തിരുവനന്തപുരം:കെ.പി.സി.സി വക്താവ് രാജ് മോഹന്‍ ഉണ്ണിത്താനെ കടന്നാക്രമിച്ച് കെ.മുരളീധരന്‍. പാര്‍ട്ടി നിലപാട് പറയേണ്ടത് അധ്യക്ഷനാണ്. വീട്ടുകാർ സംസാരിക്കുന്നിടത്ത് കുശിനിക്കാർ സംസാരിക്കേണ്ടതില്ല. താന്‍ അനാശാസ്യ കേസില്‍ പ്രതിയായി പാർട്ടിക്ക് നാണക്കേടുണ്ടാക്കിയിട്ടില്ലെന്നും മുരളീധരന്‍ പറഞ്ഞു. 

പ്രതിപക്ഷത്തെ വിമര്‍ശിച്ചുകൊണ്ടുള്ള പരാമര്‍ശങ്ങളില്‍ ഉറച്ചുനില്‍ക്കുന്നുവെന്നുംമുരളീധരന്‍ പറഞ്ഞു. പ്രവര്‍ത്തകരുടെ വികാരമാണ് പങ്കുവെച്ചത്. ഘടകകക്ഷികള്‍ക്കും അതൃപ്തിയുണ്ട്. പാർട്ടി നിലപാട് പറയേണ്ടത് അധ്യക്ഷനാണ്. മറ്റാരെങ്കിലും നിന്ന് കുരച്ചാല്‍ പുച്ഛത്തോടെ തള്ളുമെന്നും അദ്ദേഹം പറഞ്ഞു.

കേരളത്തില്‍ പ്രതിപക്ഷമില്ലെന്നും സര്‍ക്കാരിന്റെ ഭരണ പരാജയങ്ങള്‍ തുറന്നു കാട്ടാന്‍ കോണ്‍ഗ്രസിനായില്ലെന്നും കഴിഞ്ഞ ദിവസം മുരളീധരന്‍ പറഞ്ഞിരുന്നു. ഭരണപക്ഷവും പ്രതിപക്ഷവും ഒക്കെ എല്‍.ഡി.എഫ് തന്നെയാണ്. കോണ്‍ഗ്രസിന്റെ പ്രവര്‍ത്തനം പ്രസ്താവനകളില്‍ മാത്രമായി ചുരുങ്ങി. ചാനലുകളില്‍ മുഖം കാണിക്കാന്‍ കോണ്‍ഗ്രസുകാര്‍ തല്ലു കൂടുകയാണെന്നും അദ്ദേഹം പരിഹസിച്ചു.

അതേസമയം മുരളിയുടെ ഈ പ്രസ്താവനയ്ക്ക് മറുപടിയുമായി ഉണ്ണിത്താനും രംഗത്തെത്തി. മുരളീധരന്റെ പ്രസ്താവന കോണ്‍ഗ്രസിന്റെ മനോവീര്യം തകര്‍ക്കാനും യു.ഡി.എഫിനെ ദുര്‍ബ്ബലപ്പെടുത്താനുമാണ് ഉപകരിക്കുകയെന്നുമാണ് ഉണ്ണിത്താന്‍ പറഞ്ഞത്. കെ.പി.സി.സി നടത്തുന്ന തുടര്‍സമരങ്ങളൊന്നും മുരളീധരന്‍ അറിയുന്നില്ല. 14 ഡി.സി.സികളും സംഘടിപ്പിച്ച കെ. കരുണാകരന്‍ അനുസ്മരങ്ങളില്‍ ഒന്നില്‍പോലും മുരളീധരന്‍ പങ്കെടുത്തിരുന്നില്ലെന്നും അദ്ദേഹം മറുപടിയായി പറഞ്ഞിരുന്നു. 

അതേസമയം കെ.മുരളീധരനെ അനുകൂലിച്ച് എ ഗ്രൂപ്പ് രംഗത്തെത്തി. . കെ.പി.സി.സി അധ്യക്ഷന് കെ.സി. ജോസഫ് കത്തയച്ചു. ഉണ്ണിത്താന്റെ അഭിപ്രായം പാര്‍ട്ടിയുടേതാണോയെന്ന് വ്യക്തമാക്കണം. പാര്‍ട്ടി വക്താവെന്ന നിലയില്‍ എന്തും വിളിച്ചുപറയാന്‍ അനുവദിക്കരുതെന്നും വക്താക്കളെ നിയന്ത്രിക്കണമെന്നും കത്തില്‍ പറയുന്നു.