കളമശേരി: ട്രെയിന്‍ യാത്രക്കിടെ നടന്ന മോഷണത്തില്‍ യാത്രക്കാരന് നഷ്ടപരിഹാരം നല്‍കാന്‍ ഉപഭോക്തൃ കോടതി വിധിച്ചു. കൊല്ലം കിളികൊല്ലൂര്‍ എം.ജി നഗറില്‍ എസ്.കെ ബില്‍ഡിങ്ങില്‍ ഉണ്ണികൃഷ്ണന്റെ പരാതിയിലാണ് എറണാകുളം ഉപഭോക്തൃ കോടതി വിധിയുണ്ടായത്.
ഉണ്ണികൃഷ്ണനും ഭാര്യയും 2014ല്‍ കൊല്ലത്തു നിന്നും അഹമ്മദബാദിന് പോകുമ്പോഴാണ് റിസര്‍വേഷന്‍ കംപാര്‍ട്ട് മെന്റില്‍ നിന്നും 54,000 രൂപയടങ്ങിയ ബാഗും സാധനങ്ങളും മോഷണം പോയത്. മോഷണം നടന്ന ഉടനെ ടി.ടി.ഇയെ അന്വേപ്പിച്ചെങ്കിലും കണ്ടെത്താനായില്ല. ട്രെയിന്‍ ഷൊര്‍ണൂരില്‍ എത്തിയപ്പോള്‍ റയില്‍വേ പൊലിസില്‍ പരാതി നല്‍കുകയും യാത്ര അവസാനിപ്പിക്കുകയുമായിരുന്നു.
ഉപഭോക്താവെന്ന നിലയില്‍ യാത്രക്കാരന് വേണ്ട സേവനം റയില്‍വേയുടെ ഭാഗത്തു നിന്നും ലഭിച്ചില്ലെന്ന് കോടതി പറഞ്ഞു. പരാതിക്കാരന് നഷ്ടപ്പെട്ട 54,000 രൂപയും നഷ്ടപരിഹാരമായി 16,000 രൂപയും നല്‍കണമെന്നാണ് കോടതി ഉത്തരവിട്ടിരിക്കുന്നത്.