കാസര്‍കോട്: ഫെബ്രുവരി 10, 11, 12 തിയതികളില്‍ തളങ്കര ഹുദൈബിയ്യയില്‍ നടക്കുന്ന എസ്.കെ.എസ്.എസ്.എഫ് ജില്ലാ സമ്മേളനത്തിന്റെ പ്രചാരണ ഉദ്ഘാടനം ജനുവരി രണ്ടിനു വൈകുന്നേരം ആറിനു ചട്ടഞ്ചാലില്‍ നടക്കും. സംസ്ഥാന വൈസ് പ്രസിഡന്റ് മുസ്തഫ അശ്‌റഫി കക്കുപടി ആശയവിശദീകരണം നടത്തും. പരിപാടിയുടെ വിജയത്തിനായി ഇന്നു ശാഖാ തലങ്ങളില്‍ പ്രചരണം നടത്തണമെന്ന് ജില്ലാ പ്രസിഡന്റ് താജുദ്ധീന്‍ ദാരിമി പടന്നയും ജനറല്‍ സെക്രട്ടറി ഹാരിസ് ദാരിമി ബെദിരയും അറിയിച്ചു.
സമ്മേളനത്തിന്റെ ഭാഗമായി ക്ലസ്റ്റര്‍ തലങ്ങളില്‍ ട്രെനിങ് സ്‌കൂള്‍, തൊഴില്‍ പരിശീലനയന്ത്ര വിതരണം, ജില്ലയില്‍ തിരഞ്ഞെടുക്കപ്പെട്ട വിദ്യാര്‍ഥികള്‍ക്ക് സി.എം ഉസ്താദ് സ്‌കോളര്‍ഷിപ്പ്, അടുത്തമാസം ഹയര്‍ സെക്കന്‍ഡറി സമ്മേളനം, മുതഅല്ലിം സംഗമം, ബിരുദദാരികളുടെ സംഗമം, യുവ പ്രവാഹം, ഗ്രാജുയേറ്റ് മീറ്റ്, ശാഖാ തലങ്ങളില്‍ ഖുര്‍ആന്‍ ഹിഫ്‌ള് പാരായണ മത്സരം, മേഖലാ തലങ്ങളില്‍ കെമിസ്ട്രി ഓഫ് ലൗവ് തുടങ്ങിയ ക്ലാസുകള്‍ സംഘടിപ്പിക്കും.