പോര്‍ട് എലിസബത്ത്: ശ്രീലങ്കക്കെതിരായ ഒന്നാം ക്രിക്കറ്റ് ടെസ്റ്റില്‍ ദക്ഷിണാഫ്രിക്കയ്ക്ക് ജയം. 206 റണ്‍സിന്റെ മികച്ച വിജയമാണ് ദക്ഷിണാഫ്രിക്ക സ്വന്തമാക്കിയത്. 488 റണ്‍സ് വിജയ ലക്ഷ്യം പിന്തുടര്‍ന്ന ലങ്ക 281 റണ്‍സിനു പുറത്തായി.
ദക്ഷിണാഫ്രിക്ക ഒന്നാം ഇന്നിങ്‌സില്‍ 286 റണ്‍സും ശ്രീലങ്ക 205 റണ്‍സുമാണെടുത്തത്. ദക്ഷിണാഫ്രിക്ക രണ്ടാം ഇന്നിങ്‌സില്‍ ആറു വിക്കറ്റ് നഷ്ടത്തില്‍ 406 റണ്‍സെടുത്ത് ഇന്നിങ്‌സ് ഡിക്ലയര്‍ ചെയ്യുകയായിരുന്നു.
അഞ്ചു വിക്കറ്റ് നഷ്ടത്തില്‍ 240 റണ്‍സെന്ന നിലയില്‍ അവസാന ദിനം ബാറ്റിങ് തുടങ്ങിയ ശ്രീലങ്കക്ക് 41 റണ്‍സ് കൂട്ടിച്ചേര്‍ക്കുന്നതിനിടെ അഞ്ചു വിക്കറ്റും നഷ്ടപ്പെട്ടാണ് തോല്‍വിയിലേക്ക് കൂപ്പുകുത്തിയത്. 59 റണ്‍സ് നേടിയ ക്യാപ്റ്റന്‍ ആഞ്ജലോ മാത്യൂസും 58 റണ്‍സ് നേടിയ കുശാല്‍ മെന്‍ഡിസും മാത്രമാണ് ലങ്കന്‍ നിരയില്‍ പൊരുതിയത്. ദക്ഷിണാഫ്രിക്കന്‍ നിരയില്‍ കംഗീസോ റബാഡ, കേശവ് മഹാരാജ് എന്നിവര്‍ മൂന്നു വീതം വിക്കറ്റുകള്‍ നേടി.
നേരത്തെ ആദ്യ ഇന്നിങ്‌സില്‍ അര്‍ധ സെഞ്ച്വറിയും (59) രണ്ടാം ഇന്നിങ്‌സില്‍ സെഞ്ച്വറിയും (117) നേടിയ സ്റ്റീഫന്‍ കുക്ക് കളിയിലെ കേമനായി.