കണ്ണൂര്‍: ആസാം സ്വദേശികളില്‍ നിന്നു നാല്‍പതിനായിരം രൂപതട്ടിയ കേസില്‍ മൂന്നു യുവാക്കളെ ചക്കരക്കല്‍ പൊലിസ് അറസ്റ്റു ചെയ്തു. ഇന്നലെ പുലര്‍ച്ചെ ചക്കരക്കല്‍ പൊലിസ് സ്‌റ്റേഷന്‍ പരിധിയിലെ മുട്ടോളംപാറയിലാണ് സംഭവം.
തങ്കൈകുന്നിനടുത്ത് ഫോര്‍ട്ട് ഫയര്‍സര്‍വിസ് എന്ന സ്ഥാപനത്തിനു സമീപം രമേശന്‍ എന്നയാളുടെ വാടക ക്വാര്‍ട്ടേഴ്‌സില്‍ താമസിച്ചുവരികയായിരുന്ന നാലു ആസാംകാരാണ് കവര്‍ച്ചയ്ക്കിരയായത്. ഇവരുടെ ക്വാര്‍ട്ടേഴ്‌സിലെത്തിയ മൂന്നംഗ സംഘം ഇവരെ ആയുധം കാട്ടി ഭീഷണിപ്പെടുത്തി പണം കവരുകയായിരുന്നു. സംഭവത്തില്‍ മരക്കാര്‍ കണ്ടി സ്വദേശികളായ സഹീര്‍, ഹാരിസ്, ഫിറോസ് എന്നിവരെയാണ് ചക്കരക്കല്‍ പൊലിസ് അറസ്റ്റു ചെയ്തത്. ഇവരില്‍ നിന്നു പണം കണ്ടെടുത്തതായി പൊലിസ് അറിയിച്ചു.