തിരുവനന്തപുരം: ഇന്റലിജന്‍സ് മേധാവി ആര്‍.ശ്രീലേഖയ്‌ക്കെതിരേയുള്ള വിജിലന്‍സിന്റെ പ്രാഥമിക അന്വേഷണ റിപ്പോര്‍ട്ട് നാളെ സമര്‍പ്പിക്കാന്‍ തിരുവനന്തപുരം വിജിലന്‍സ് പ്രത്യേക കോടതി ഉത്തരവിട്ടു.  
ശ്രീലേഖക്കെതിരേ പരാതി നല്‍കിയ പൊതുപ്രവര്‍ത്തകന് പൊലിസ് ഭീഷണി നേരിടുന്നുവെന്ന  ഹരജിയെ തുടര്‍ന്നാണ് വിജിലന്‍സ് പ്രത്യേക കോടതി ജഡ്ജി ബദറുദ്ദീന്റെ  ഉത്തരവ്. ട്രാന്‍സ്‌പോര്‍ട്ട് കമ്മിഷണറായിരിക്കെ ശ്രീലേഖ ഖജനാവിന് കോടികളുടെ നഷ്ടവും അഴിമതിയും നടത്തിയെന്നാണ് കേസ്.
 ഫെബ്രുവരി 17നായിരുന്നു നേരത്തെ റിപ്പോര്‍ട്ട് സമര്‍പ്പിക്കാന്‍ കോടതി ഉത്തരവിട്ടിരുന്നത്. തന്നെ പൊലിസുകാരെ കൊണ്ട് ശ്രീലേഖ ഭീഷണിപ്പെടുത്തുന്നുവെന്ന് ഹരജിക്കാരനായ പായ്ച്ചിറ നവാസ് ഇന്നലെ  തെളിവുകള്‍ സഹിതം വിജിലന്‍സ് കോടതിയെ അറിയിച്ചു.
ഇതേ തുടര്‍ന്നാണ് അടിയന്തിരമായി റിപ്പോര്‍ട്ട് സമര്‍പ്പിക്കാന്‍ വിജിലന്‍സ് കോടതി ഉത്തരവിട്ടത്.
ഇഴഞ്ഞു നീങ്ങിയ അന്വേഷണം  കോടതി ഉത്തരവിട്ടതിനെ തുടര്‍ന്ന് വേഗത്തിലായി. ഇന്നലെ അന്വേഷണ ഉദ്യോഗസ്ഥനായ എസ്.പി സുകേശന്‍ പരാതിക്കാരനായ പായ്ച്ചിറ നവാസിന്റെ മൊഴിയെടുത്തു. സ്‌പെഷ്യല്‍ ബ്രാഞ്ചിലെ  പൊലിസുകാര്‍ ഭീഷണിപ്പെടുത്തിയതിന്റെ തെളിവുകള്‍ ശേഖരിക്കുകയും ചെയ്തു.
ഏതാണ്ട് മൂന്നു മണിക്കൂറോളമാണ് മൊഴി എടുത്തത്. കുടാതെ മറ്റു പരാതിക്കാരായ ജോമോന്‍ പുത്തന്‍പരയ്ക്കലിന്റെയും, ജോണ്‍സന്‍ പടമാടന്റെയും മൊഴിയെടുത്തിട്ടുണ്ട്.  
ശ്രീലേഖ ട്രാന്‍സ്‌പോര്‍ട്ട് കമ്മിഷണറായിരുന്നപ്പോള്‍ മൂന്നു കോടി രൂപയുടെ അഴിമതി ഉള്‍പ്പെടെ 12 ആരോപണങ്ങളാണുള്ളത്.  
ശ്രീലേഖയ്‌ക്കെതിരായ  അന്വേഷണം നീട്ടിക്കൊണ്ടു പോകുന്നതിനെതിരേ  തിരുവനന്തപുരം വിജിലന്‍സ് കോടതി കഴിഞ്ഞ ദിവസം രൂക്ഷമായി വിമര്‍ശിച്ചിരുന്നു.