തൊട്ടില്‍പ്പാലം: മൊകേരി കോവുക്കുന്നില്‍ തെരുവ്‌നായയുടെ ആക്രമണത്തില്‍ മധ്യവയസ്‌ക്കനും പശുക്കുട്ടിക്കും കടിയേറ്റു. മാമ്പൊയില്‍ എം.പി ബാല(57)നാണ് കടിയേറ്റത്. ബുധനാഴ്ച വൈകീട്ട് ഏഴിനാണ് സംഭവം. ആക്രമണത്തില്‍ കൈപ്പത്തിക്ക് സാരമായി പരുക്കേറ്റ ബാലനെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. തടിയം കുളത്തില്‍ ബാലകൃഷ്ണന്റെ പശുക്കുട്ടിയുടെ മുഖത്താണ് കടിയേറ്റത്. ജോലി കഴിഞ്ഞ് മടങ്ങുകയായിരുന്ന ടി.കെ മോഹനും നേരെയും ആക്രമണ ശ്രമമുണ്ടായി. കഴിഞ്ഞ ഏതാനും ദിവസങ്ങള്‍ക്കു മുന്‍പ് പുതിയോട്ടില്‍ അശോകന്റെ 28-ഓളം കോഴിക്കുഞ്ഞുങ്ങളെ തെരുവ് നായ്ക്കള്‍ കടിച്ചു കൊന്നിരുന്നു. അതേസമയം, പ്രദേശത്ത് നായകളുടെ ശല്യം രൂക്ഷമായിട്ടും അധികൃതര്‍ നടപടി സ്വീകരിക്കുന്നില്ലെന്നാണ് നാട്ടുകാര്‍ പരാതിപ്പെടുന്നത്.