ശ്രീകണ്ഠപുരം: മലയോര മേഖലയില്‍ വന്യമൃഗ ജീവികളുടെ ശല്യത്തില്‍ വിളകള്‍ നശിച്ച കര്‍ഷകര്‍ ദുരിതത്തില്‍. ചെങ്ങളായി പഞ്ചായത്തിലെ തവറൂല്‍, കൊയ്യം പ്രദേശങ്ങളില്‍ വാനരശല്യം മൂലം നാളികേരം, മരച്ചീനി, പപ്പായ എന്നിവ കര്‍ഷകര്‍ക്കു ലഭിക്കാതെയായി. കാഞ്ഞിലേരി, ചേപ്പറമ്പ് ഭാഗങ്ങളിലും കുരങ്ങ് ശല്യം കാരണം കര്‍ഷകര്‍ ദുരിതത്തിലാണ്. മലപ്പട്ടം പഞ്ചായത്തിലെ അടിച്ചേരി, തായത്ത്‌വയല്‍ ഭാഗങ്ങളില്‍മുള്ളന്‍പന്നിയുടെ ശല്യം കാരണം കര്‍ഷകരുടെ മരച്ചീനി വ്യാപകമായി നശിപ്പിക്കപ്പെട്ടിട്ടുണ്ട്. വനം വകുപ്പില്‍ വിവരമറിയിച്ചെങ്കിലും നടപടിയെടുക്കുന്നില്ലെന്നു കര്‍ഷകര്‍ പറയുന്നു. ചൂളിയാട് തലക്കോട്, പാവന്നൂര്‍, ചേടിച്ചേരി ഭാഗങ്ങളില്‍ വാനരശല്യത്തിന് പുറമേ കാട്ടുപന്നി ശല്യവും രൂക്ഷമാണ്. മരച്ചീനി, ചേമ്പ്, മധുരക്കിഴങ്ങ് തുടങ്ങിയ കാര്‍ഷിക വിളകള്‍ ഇവ നശിപ്പിക്കുന്നു.