തിരുവനന്തപുരം: യു.ഡി.എഫ് സര്‍ക്കാരിലെ മുഖ്യമന്ത്രി അടക്കമുള്ള 19 മന്ത്രിമാരുടെ ഫോണ്‍ ബില്ലിനെ കുറിച്ച് അന്വേഷിക്കണമെന്നാവശ്യപ്പെട്ട് വിജിലന്‍സിന് പരാതി. പൊതുപ്രവര്‍ത്തകനായ പായിച്ചിറ നവാസാണ് വിജിലന്‍സ് ഡയറക്ടര്‍ക്ക് പരാതി നല്‍കിയത്. യാതൊരു മാനദണ്ഡവും പാലിക്കാതെയും പണം കൈപ്പറ്റുന്നതിനുള്ള നിയമങ്ങളും ചട്ടങ്ങളും പാലിക്കാതെയുമാണ് പൊതുഭരണവകുപ്പ് മന്ത്രിമാരുടെ ടെലിഫോണ്‍ ചാര്‍ജിനായുള്ള കോടിക്കണക്കിന് രൂപ നല്‍കിയിരിക്കുന്നതെന്നാണ് പരാതി.
പൊതു ഭരണ വകുപ്പ് സെക്രട്ടറിയെയും പ്രതിപ്പട്ടികയില്‍ ചേര്‍ത്തിട്ടുണ്ട്. മന്ത്രിമാര്‍ മൊബൈല്‍ ഫോണ്‍ ചാര്‍ജിനത്തില്‍ മാത്രം കൈപ്പറ്റിയിരിക്കുന്ന 2016 ഏപ്രില്‍വരെയുള്ള കണക്കുകളും പരാതിക്കാരന്‍ ഹാജരാക്കി. പരാതി കൂടുതല്‍ അന്വേഷണത്തിനായി വിജിലന്‍സ് ഡയറക്ടര്‍ ജേക്കബ് തോമസ് ആഭ്യന്തര അഡീഷനല്‍ ചീഫ് സെക്രട്ടറി നളിനി നെറ്റോയ്ക്ക് കൈമാറി.
അതേ സമയം, മുന്‍ മുഖ്യമന്ത്രി ഉമ്മന്‍ചാണ്ടി, മുന്‍ വ്യവസായമന്ത്രി പി.കെ കുഞ്ഞാലിക്കുട്ടി, മുന്‍ ചീഫ് സെക്രട്ടറി, മുന്‍ വ്യവസായ വകുപ്പ് സെക്രട്ടറി പി.ജെ കുര്യന്‍, കെ.എസ്.ഐ.ഡി.സി മാനേജിങ് ഡയറക്ടര്‍ എന്നിവരെ എതിര്‍കക്ഷിയാക്കി എമര്‍ജിംഗ് കേരള നടത്തിപ്പുമായി ബന്ധപ്പെട്ട് നവാസ് വിജിലന്‍സ് കോടതിയിലും ഹരജി നല്‍കി.
ഹരജി ഫയലില്‍ സ്വീകരിച്ച കോടതി പത്തു ദിവസത്തിനകം റിപ്പോര്‍ട്ട് നല്‍കാന്‍ വിജിലന്‍സിനോട് ആവശ്യപ്പെട്ടു. കേസ് 28ന് പരിഗണിക്കും.