കാസര്‍കോട്: രാഷ്ട്രകവി ഗോവിന്ദ പൈയുടെ സ്മരണാര്‍ഥം മഞ്ചേശ്വരത്ത് കേരള-കര്‍ണാടക സര്‍ക്കാരിന്റെ സംയുക്താഭിമുഖ്യത്തില്‍ നിര്‍മിച്ച ഗിളിവിണ്ടു നാളെ വൈകുന്നേരം 3.30നു മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. കേന്ദ്രത്തിനു സമീപത്തായി നിര്‍മിച്ച ഭവനിക ഓഡിറ്റോറിയം കര്‍ണാടക മുഖ്യമന്ത്രി സിദ്ധരാമയ്യയും ഉദ്ഘാടനം ചെയ്യും.
പുതുക്കിപ്പണിത രാഷ്ട്രകവിയുടെ വീട് മന്ത്രി എ.കെ ബാലനും യക്ഷഗാന മ്യൂസിയം മന്ത്രി ഇ ചന്ദ്രശേഖരനും യക്ഷഗാന ഓഡിറ്റോറിയം കര്‍ണാടക മന്ത്രി ബി രാമനാഥ റൈയും ഉദ്ഘാടനം ചെയ്യും.
രാഷ്ട്ര കവിയുടെ പ്രതിമ മന്ത്രി ഉമാശ്രീ അനാച്ഛാദനം ചെയ്യും. പി.ബി.അബ്ദുള്‍ റസാഖ് എം.എല്‍.എ അധ്യക്ഷനാവും. എം.പിമാരായ ഡോ. എം വീരപ്പ മൊയ്‌ലി, പി.കരുണാകരന്‍, എം.എല്‍.എ മാരായ എന്‍.എ നല്ലിക്കുന്ന്, കെ കുഞ്ഞിരാമന്‍, എം രാജഗോപാലന്‍, ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍, ജില്ലാ കലക്ടര്‍ കെ ജീവന്‍ ബാബു തുടങ്ങിയവര്‍ സംബന്ധിക്കും.