മേപ്പാടി: സാമ്പത്തിക പ്രതിസന്ധി ചൂണ്ടിക്കാട്ടി അടച്ചുപൂട്ടിയ ചെമ്പ്ര എസ്റ്റേറ്റ് തുറക്കാന്‍ നടപടിയില്ലാത്തത് തൊഴിലാളികളുടെ ജീവിതത്തെ ദുരിത പൂര്‍ണമാക്കുന്നു. ഒക്ടോബര്‍ 27നാണ് തോട്ടം ലോക്കൗട്ട് ചെയ്തത്. തോട്ടം തുറക്കുന്നത് സംബന്ധിച്ച് പലവട്ടം ചര്‍ച്ചകള്‍ നടന്നെങ്കിലും ഫലം കണ്ടില്ല. തൊഴിലാളികള്‍ തന്നെ തേയില കൊളുന്ത് വെട്ടി വില്‍പ്പന നടത്തിയെങ്കിലും വേനല്‍ കനത്തതോടെ കൊളുന്ത് തീരെ ഇല്ലാത്തതിനാല്‍ ചപ്പ് വെട്ടല്‍ നിര്‍ത്തിവച്ചു. ഇതോടെ ജീവിതം കൂടുതല്‍ പ്രയാസകരമായെന്ന് തൊഴിലാളികള്‍ പറഞ്ഞു. ലേബര്‍ കമ്മിഷന്‍ വിളിച്ച് ചേര്‍ത്ത നാല് ചര്‍ച്ചകളാണ് പരാജയപ്പെട്ടത്. കമ്പനിയുടെ പിടിവാശിയാണ് ചര്‍ച്ചകള്‍ പരാജയപ്പെടാന്‍ കാരണമെന്നാണ് ട്രേഡ് യൂനിയന്‍ നേതാക്കള്‍ ആരോപിക്കുന്നത്. രണ്ട് മാസത്തെ ശമ്പളവും കഴിഞ്ഞ വര്‍ഷത്തെ ബോണസും നല്‍കാതെയാണ് തോട്ടം ലോക്കൗട്ട് ചെയ്തത്. ലോക്കൗട്ട് പിന്‍വലിച്ച ശേഷം മാത്രം ചര്‍ച്ചകള്‍ മതിയെന്നായിരുന്നു ട്രേഡ് യൂനിയന്‍ കൈക്കൊണ്ട നിലപാട്. എന്നാല്‍ വ്യക്തമായ നിലപാടെടുത്ത ശേഷം മാത്രമേ ലോക്കൗട്ട് പിന്‍വലിക്കുന്നത് സംബന്ധിച്ച് തീരുമാനമെടുക്കാവൂ എന്നാണ് കമ്പനി പ്രതിനിധികള്‍ പറയുന്നത്.