തിരുരങ്ങാടി: കൊടിഞ്ഞി പുല്ലാണി ഫൈസല്‍ വധക്കേസില്‍ മുഴുവന്‍ പ്രതികളെയും അറസ്റ്റ് ചെയ്യണമെന്നാവശ്യപ്പെട്ടും അന്വേഷണം അട്ടിമറിക്കുന്നതില്‍ പ്രതിഷേധിച്ചും സര്‍വ്വകക്ഷിയുടെ നേതൃത്വത്തില്‍ ചെമ്മാട് ടൗണും കക്കാട് ദേശീയ പാതയും ഉപരോധിച്ചു. അന്വേഷണ സംഘത്തെ മാറ്റി നിയമിച്ചതോടെയാണ് സമരം അവസാനിപ്പിച്ചത്.
ഗൂഢാലോചന കേന്ദ്രങ്ങള്‍ക്കെതിരേ നടപടി സ്വീകരിക്കുക, കുടുംബത്തിന് ധനസഹായം പ്രഖ്യാപിക്കുക, ഭാര്യയ്ക്ക് സര്‍ക്കാര്‍ ജോലി നല്‍കുക എന്നീ ആവശ്യങ്ങള്‍ ഉന്നയിച്ച് ഫൈസലിന്റെ കുടുംബത്തിന്റെ നേതൃത്വത്തിലാണ് സമരം നടത്തിയത്. രാവിലെ 10 ന് ആരംഭിച്ച സമരം രണ്ടിടങ്ങളിലായി വൈകീട്ട് ആറര വരെ നീണ്ടു.
കാലത്ത് പത്തിന് ചെമ്മാട് ടൗണിലാണ് ഉപരോധം ആരംഭിച്ചത്. ഉച്ചയോടെ തിരൂര്‍ ആര്‍.ഡി.ഒ. ടി.വി സുഭാഷിന്റെ നേതൃത്വത്തില്‍ സ്ഥലം എം.എല്‍.എ പി.കെ അബ്ദുറബ്ബിന്റെ നേതൃത്വത്തില്‍ സര്‍വകക്ഷി പ്രതിനിധികള്‍ തഹസില്‍ദാര്‍ ഗോപാലകൃഷ്ണന്‍ , ഡിവൈ.എസ്.പി സുരേഷ്‌കുമാര്‍, തിരൂരങ്ങാടി സി.ഐ ബാബുരാജ് എന്നിവരുമായി ഏറെ നേരം ചര്‍ച്ച നടത്തി. എസ്.പിയുടെ നേതൃത്വത്തിലുള്ള നിലവിലെ സംഘത്തെ മാറ്റി അന്വേഷണം നടത്തണമെന്ന് എം.എല്‍.എ ആവശ്യപ്പെട്ടെങ്കിലും ആര്‍.ഡി.ഒ, കലക്ടര്‍ എന്നിവര്‍ക്ക് ഉറപ്പ് നല്‍കാനായില്ല.
രണ്ടുമണിക്കൂര്‍ നീണ്ട ചര്‍ച്ച പരാജയപ്പെട്ടതിനെതുടര്‍ന്ന് പി.കെ അബ്ദുറബ്ബിന്റെ നേതൃത്വത്തില്‍ ഉച്ചയ്ക്ക് രണ്ടരയോടെ ഉപരോധം ദേശീയപാതയില്‍ കക്കാട്ടേക്ക് മാറ്റുകയായിരുന്നു.
ഫൈസലിന്റെ പിതാവ് അനന്തകൃഷ്ണന്‍ നായര്‍, മാതാവ് ജമീല, സഹോദരിമാരായ കവിത, സുവിത, ഇവരുടെ മക്കള്‍, ഫൈസലിന്റെ മക്കളായ ഫഹദ്, ഫായിസ്, ഫര്‍സാന, മറ്റു കുടുംബാംഗങ്ങള്‍ തുടങ്ങി സ്ത്രീകളുള്‍പ്പെടെ ആയിരങ്ങളാണ് സമരത്തിനിറങ്ങിയത്. ചെമ്മാട് ടൗണിലും, കക്കാട് ദേശീയപാതയിലും മണിക്കൂറുകള്‍ ഗതാഗതം തടസ്സപ്പെട്ടു. സ്ഥലത്ത് വന്‍ പൊലിസ് സന്നാഹം തമ്പടിച്ചിരുന്നു.
അന്വേഷണ ചുമതല ക്രൈംബ്രാഞ്ച് ഡിവൈ.എസ്.പി എം.പി മോഹനചന്ദ്രന് കൈമാറിയതായി ഐ.ജിയുടെ ഉത്തരവ് ലഭിച്ചതോടെ വൈകീട്ട് ആറരയോടെയാണ് ഉപരോധം ആവസാനിപ്പിച്ചത്. ചെമ്മാട് ടൗണില്‍ ഉപരോധസമരം പി.കെ.അബ്ദുറബ്ബ് എം.എല്‍.എ ഉദ്ഘാടനം ചെയ്തു. നന്നമ്പ്ര പഞ്ചായത്ത് പ്രസിഡന്റ് എം.പി മുഹമ്മദ് ഹസന്‍ അധ്യക്ഷനായി.