മാവൂര്‍: പുവ്വാട്ടുപറമ്പില്‍ പെരുവയല്‍മണ്ഡലം കോണ്‍ഗ്രസ് കമ്മിറ്റി ഒരുകോടി രൂപയോളം ചെലവഴിച്ച് നിര്‍മിച്ച ഇന്ദിരാഭവന്‍ ഉദ്ഘാടനവും ഡി.സി.സി പ്രസിഡന്റായി തെരഞ്ഞെടുക്കപ്പെട്ട അഡ്വ. ടി. സിദ്ദീഖിന് സ്വീകരണവും ഇന്ന് നടക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. വെള്ളിയാഴ്ച വൈകിട്ട് അഞ്ചിന് മുന്‍ മുഖ്യമന്ത്രി ഉമ്മന്‍ചാണ്ടിയാണ് ഓഫിസ് സമുച്ചയം ഉദ്ഘാടനം ചെയ്യുക. കെ. കരുണാകരന്‍ സ്മാരക ഹാളിന്റെ ഉദ്ഘാടനം കെ. മുരളീധരന്‍ എം.എല്‍.എയും മഹാത്മാ ലൈബ്രറി ആന്‍ഡ് റീഡിംങ് റൂമിന്റെ ഉദ്ഘാടനം എം.കെ രാഘവന്‍ എം.പിയും നിര്‍വഹിക്കും. വി. കൃഷ്ണന്‍കുട്ടി നായര്‍ സ്മാരക ഓഡിറ്റോറിയം ഡി.സി.സി പ്രസിഡന്റ് അഡ്വ. ടി. സിദ്ദീഖ് ഉദ്ഘാടനം ചെയ്യും. മുന്‍ എം.എല്‍.എ ബെന്നി ബെഹനാന്‍, യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ്, കെ.പി.സി.സി ഭാരവാഹികളായ പി.എം സുരേഷ് ബാബു, എന്‍. സുബ്രഹ്മണ്യന്‍, കെ.പി അനില്‍കുമാര്‍ തുടങ്ങിയവര്‍ പങ്കെടുക്കും. ഇന്ദിരാഭവന്റെ ഗ്രൗണ്ട് ഫ്‌ളോര്‍ വാണിജ്യാവശ്യാര്‍ത്ഥമുള്ളതാണ്. രണ്ടാം നിലയിലെ ശീതീകരിച്ച ഓഡിറ്റോറിയത്തില്‍നിന്നുള്ള വരുമാനത്തിന്റെ 50 ശതമാനം ജീവകാരുണ്യ പ്രവര്‍ത്തനങ്ങള്‍ക്ക് വേണ്ടി നീക്കി വെക്കും . സി മാധവദാസ്, സി.എം സദാശിവന്‍, എന്‍.അബൂബക്കര്‍, രവികുമാര്‍ പനോളി എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.