ഇസ്‌ലാമാബാദ്: മുന്‍ പാകിസ്താന്‍ പ്രധാനമന്ത്രി നവാസ് ശരീഫ് രാജ്യംവിട്ടു. പാനമ അഴിമതി കേസില്‍ അയോഗ്യനാക്കപ്പെട്ട ശരീഫ് കഴിഞ്ഞ ദിവസം സഊദി എയര്‍ലൈന്‍സ് വഴി സഊദി അറേബ്യയിലെത്തിയതായി പാക് മാധ്യമങ്ങള്‍ റിപ്പോര്‍ട്ട് ചെയ്തു. പാക് സൈന്യവുമായി നവാസ് ശരീഫിന്റെ കുടുംബം രഹസ്യ കരാറിലെത്തിയതായി ആരോപണമുയരുന്നതിനിടെയാണ് പുതിയ നീക്കം.
ശനിയാഴ്ച രാത്രി തന്നെ ശരീഫ് റിയാദിലെത്തിയതായി മാധ്യമങ്ങള്‍ റിപ്പോര്‍ട്ട് ചെയ്തു. സല്‍മാന്‍ രാജാവുമായും സഊദി കിരീടാവകാശി മുഹമ്മദ് ബിന്‍ സല്‍മാനുമായും തമ്മില്‍ നവാസ് ശരീഫ് കൂടിക്കാഴ്ച നടത്തുമെന്നാണു വിവരം. കൂടിക്കാഴ്ചയില്‍ പ്രധാനപ്പെട്ട കാര്യങ്ങള്‍ ചര്‍ച്ച ചെയ്യുമെന്ന് പാകിസ്താന്‍ മുസ്‌ലിം ലീഗ്-നവാസ്(പി.എം.എല്‍-എന്‍) അറിയിച്ചു. ശരീഫിന്റെ ഇളയ സഹോദരനും പാകിസ്താനിലെ പഞ്ചാബ് പ്രവിശ്യാ മുഖ്യമന്ത്രിയുമായ ശഹബാസ് ശരീഫ് കഴിഞ്ഞ ബുധനാഴ്ച സഊദി സന്ദര്‍ശിച്ചിരുന്നു. സഊദി സര്‍ക്കാര്‍ അയച്ച പ്രത്യേക വിമാനത്തിലായിരുന്നു അദ്ദേഹം റിയാദിലെത്തിയത്. നവാസ് ശരീഫിന്റെ സന്ദര്‍ശനത്തിനു മുന്നോടിയായായിരുന്നു ശഹബാസിന്റെ സന്ദര്‍ശനം എന്നാണ് അറിയുന്നത്.
കഴിഞ്ഞ വര്‍ഷം ജൂലൈ 28നാണ് 67കാരനായ നവാസ് ശരീഫിനെ പാക് സുപ്രിംകോടതി അയോഗ്യനാക്കിയത്. തുടര്‍ന്ന് അദ്ദേഹം പ്രധാനമന്ത്രി പദവി രാജിവയ്ക്കുകയായിരുന്നു. പാനമ അഴിമതിയുമായി ബന്ധപ്പെട്ട് മൂന്ന് കേസുകളാണ് മക്കളും മരുമക്കളും അടക്കമുള്ള നവാസ് ശരീഫിന്റെ കുടുംബത്തിനെതിരേയുള്ളത്. കേസില്‍ കോടതി ഇതുവരെ ശിക്ഷാവിധി പുറപ്പെടുവിച്ചിട്ടില്ല.
ശരീഫിന്റെ രാഷ്ട്രീയഭാവിക്ക് അന്ത്യം കുറിക്കുന്നതായിരുന്നു കോടതി വിധി. എന്നാല്‍, കേസുകള്‍ രാഷ്ട്രീയപ്രേരിതമാണെന്നാണ് അദ്ദേഹത്തിന്റെ കുടുംബം ആരോപിക്കുന്നത്.
ശരീഫിന്റെ സഊദി സന്ദര്‍ശനത്തിനെതിരേ വിവിധ രാഷ്ട്രീയ പാര്‍ട്ടികള്‍ രംഗത്തെത്തിയിട്ടുണ്ട്. കേസില്‍ രാഷ്ട്രീയതലത്തില്‍ അനുരഞ്ജന ശ്രമങ്ങള്‍ നടക്കുന്നതായുള്ള ആരോപണം തെളിയിക്കുന്നതാണ് സന്ദര്‍ശനമെന്ന് പാക് പ്രതിപക്ഷ നേതാവ് സയ്യിദ് ഖുര്‍ശിദ് ഷാ ആരോപിച്ചു. പാകിസ്താന്റെ ആഭ്യന്തര വിഷയങ്ങളില്‍ വിദേശികള്‍ ഇടപെടുന്നത് തെറ്റാണ്. പാക് സര്‍ക്കാരിനും ശരീഫിനുമിടയില്‍ അനുരഞ്ജനത്തിനായി സഊദി ഇടപെടുകയാണെങ്കില്‍ അത് രാജ്യത്തിന്റെ പരാജയമാണെന്നും ഒരു ആണവ ശക്തിയായ രാജ്യത്തിനു സ്വന്തം തീരുമാനങ്ങള്‍ കൈക്കൊള്ളാന്‍ സാധിക്കാത്തത് നാണക്കേടാകുമെന്നും അദ്ദേഹം കൂട്ടിച്ചേര്‍ത്തു.