ദുബായ്: ഇന്ത്യയുടെ 68-ാം റിപ്പബ്ലിക്ക് ദിനത്തോടനുബന്ധിച്ച് ദുബായ് ബുര്‍ജ് ഖലീഫ മൂവര്‍ണമണിഞ്ഞു. വ്യഴാഴ്ച നടക്കുന്ന റിപ്പബ്ലിക്ക് ദിന പരേഡില്‍ മുഖ്യാതിഥിയായി അബുദാബി കിരീടവകാശി ഷെയ്ഖ് മുഹമ്മദ് ബിന്‍ സായിദ് അല്‍ നെഹ്യാന്‍ എത്തിയ സാഹചര്യത്തിലാണിത്.

ഇന്ത്യാ- യു.എ.ഇ നയതന്ത്ര ബന്ധം ഊട്ടിയുറപ്പിക്കുന്ന തരത്തിലാണ് മുഹമ്മദ് ബിന്‍ സായിദിന്റെ സന്ദര്‍ശനം വിലയിരുത്തുന്നത്. ഇന്ന് പ്രധാനമന്ത്രി നരേന്ദ്ര മോദിയുമായി നടത്തിയ കൂടിക്കാഴ്ചയില്‍ പ്രതിരോധ മേഖലയിലടക്കം 14 കരാറുകളില്‍ ഒപ്പുവച്ചു.

മനുഷ്യക്കടത്ത് തടയുക, ഇരു രാജ്യങ്ങളുമായുള്ള വ്യാപാരം വര്‍ധിപ്പിക്കുന്നതിന് ചെറുകിട വ്യാപാരം പ്രോത്സാഹിക്കുക, സൈബര്‍ സുരക്ഷ വര്‍ധിപ്പിക്കുക, കടല്‍ വഴിയുള്ള വ്യാപാരം വര്‍ധിപ്പിക്കുക, ഷിപ്പിംഗ് സര്‍ട്ടിഫിക്കേഷന്‍, അടിസ്ഥാന സൗകര്യ വികസനം, തുടങ്ങിയ പ്രധാന കരാറുകളിലാണ് ഇരു രാജ്യങ്ങളും ഒപ്പുവെച്ചത്.