നിലമ്പൂര്‍: ജില്ലാ ആശുപത്രിയിലെ സ്‌പെഷലൈസ്ഡ് ഡോക്ടര്‍മാരില്‍ ഒരു വിഭാഗം ഒപ്പിട്ടു മുങ്ങുന്നതു പതിവാകുന്നു. ഇക്കാര്യത്തില്‍ കര്‍ശന നടപടിക്ക് സൂപ്രണ്ട് മുതിര്‍ന്നതോടെ ഒരു വിഭാഗം ഡോക്ടര്‍മാര്‍ പ്രതിഷേധവുമായി രംഗത്തെത്തിയിരിക്കുകയാണ്. 26ന് ആശുപത്രിയില്‍ സൂപ്രണ്ട് ഡോ. സീമാമുവും നേത്രരോഗ വിദഗ്ധന്‍ ഡോ. ജലാലും തമ്മിലുള്ള അടിപിടി ഇതിന്റെ തുര്‍ച്ച മാത്രമാണെന്നു വിലയിരുത്തപ്പെടുന്നു.
ആശുപത്രിയില്‍ നേത്ര-ദന്ത-ഓര്‍ത്തോ വിഭാഗങ്ങളെ സംബന്ധിച്ച് പരാതി നേരത്തേതന്നെ ഉയര്‍ന്നതാണ്. ഇവയില്‍ നേത്ര-ദന്ത വിഭാഗങ്ങള്‍ക്കു പ്രത്യേകം ഉപകരണങ്ങള്‍ സംവിധാനം ചെയ്ത മുറികള്‍തന്നെയുണ്ട്. ആധുനിക സംവിധാനങ്ങളുള്ള ഉപകരണങ്ങളും ഇവിടങ്ങളിലുണ്ട്. ഒ.പി സമയം കൂടുതലും ഈ രണ്ടു മുറികളും അടച്ചിട്ട നിലയിലായിരിക്കുമെന്ന് ആശുപത്രിയിലെത്തുന്ന രോഗികള്‍ ആരോപിക്കുന്നു. രജിസ്റ്ററില്‍ ഒപ്പിട്ടു മുങ്ങുകയാണ് ചിലര്‍ ചെയ്യുന്നതെന്നാണ് ആരോപണം.
ജില്ലാ ആശുപത്രിയില്‍ ചികിത്സയ്ക്കു വരുന്ന രോഗികള്‍ക്കു മതിയായ പരിശോധനയും ആശുപത്രിയില്‍നിന്നു ലഭിക്കാറില്ലെന്നും ആക്ഷേപമുണ്ട്. എന്നാല്‍, ഇവിടെയുള്ള സ്‌പെഷലൈസ്ഡ് ഡോക്ടര്‍മാരില്‍ ചിലര്‍ അവരുടെ സ്വകാര്യ പ്രാക്ടീസ് സ്ഥലത്തു കൂടുതലായി രോഗികള്‍ക്ക് പരിഗണന നല്‍കുന്നതായും പറയുന്നു. ആശുപത്രിയിലെ കോള്‍ ഡ്യൂട്ടി ചെയ്യുന്നതിലും ചില ഡോക്ടര്‍മാര്‍ അംലഭാവം കാണിക്കുന്നതായി ആക്ഷേപമുണ്ടായിരുന്നു. എച്ച്.എം.സിയില്‍നിന്നും രോഗികളില്‍നിന്നും നിരന്തരം പരാതി ഉയര്‍ന്നതിനെ തുടര്‍ന്നു സൂപ്രണ്ട് കര്‍ശന പരിശോധന തുടങ്ങിയതോടെ മുങ്ങുന്ന ഡോക്ടര്‍മാരുടെ പ്രതിഷേധവും കനത്തു. ഇതാണ് പിന്നീട് ജില്ലാ ആശുപത്രിയുടെ അന്തസിന് കളങ്കമേല്‍ക്കുന്ന സംഭവത്തിലേക്ക് നയിച്ചതെന്നാണ് വിലയിരുത്തപ്പെടുത്തുന്നത്.
ആശുപത്രിയില്‍ ഒരു ഡോക്ടര്‍ നിലമ്പൂര്‍ രാധാ വധക്കേസിലെ പ്രതി ബിജു നായരുമായി അടുത്ത ബന്ധമുള്ള ആളാണ്. മരുന്ന് കമ്പനികളുമായി ബന്ധപ്പെട്ടു ചില ഡോക്ടര്‍മാര്‍ കമ്മിഷന്‍ കൈപ്പറ്റുന്നതും ആരോപണമുയര്‍ന്നിരുന്നു. ഇതു തടയാന്‍ ശ്രമിച്ചതാണ് ഡോക്ടര്‍മാരില്‍ ഒരു വിഭാഗം സൂപ്രണ്ടിനെതിരേ രംഗത്തുവരാനിടയാക്കിയതെന്നാണ് ആരോപണം. അതേസമയം, സൂപ്രണ്ടിനെ അനുകൂലിച്ച് ആശുപത്രിയിലെ ജീവനക്കാരും ഒരു വിഭാഗം ഡോക്ടര്‍മാരും രംഗത്തുവന്നിട്ടുണ്ട്.
ഒ.പി സമയം ആരംഭിക്കുന്ന സമയത്തു പോലും ഡോക്ടര്‍മാരില്‍ ചിലര്‍ സ്വകാര്യ പ്രാക്ടീസ് നടത്തുന്നുണ്ട്. മണിക്കൂറുകള്‍ കഴിഞ്ഞാണ് അവര്‍ ഒ.പിയിലെത്തുന്നത്. ഒ.പി സമയം തീരുന്നതിനു മുന്‍പു മുങ്ങുന്നതും പതിവാണ്. ആശുപത്രിയിലെ ഭൂരിഭാഗം ഡോക്ടര്‍മാരെയും മാറ്റി ജനങ്ങളോട് കൂടുതല്‍ സേവനോന്മുഖരായവരെ നിയമിക്കണമെന്ന ആവശ്യവും ഉയര്‍ന്നിട്ടുണ്ട്.