അരീക്കോട്: അനധികൃത മണല്‍ക്കടത്തിന് ഉപയോഗിച്ച തോണികളും ലോറിയും പൊലിസ് പിടിച്ചെടുത്തു. അരീക്കോട് ആതാടികടവില്‍ മണല്‍ വാരുന്നതിനിടെയാണ് അരീക്കോട് പൊലിസെത്തി വള്ളങ്ങളും ലോറിയും അഞ്ച് ലോഡ് മണലും കസ്റ്റഡിയിലെടുത്തത്. പൊലിസെത്തുന്ന വിവരമറിഞ്ഞതോടെ മണല്‍ക്കടത്തിനെത്തിയവര്‍ ഓടി രക്ഷപ്പെട്ടു. പിടിച്ചെടുത്ത രണ്ട് വള്ളങ്ങളും നശിപ്പിച്ചു. അഞ്ചു ലോഡ് മണല്‍ കലവറയിലേക്ക് കൈമാറിയതായി അരിക്കോട് എസ്.ഐ കെ സിനോദ് പറഞ്ഞു.
അനധികൃത മണല്‍ക്കടത്തുമായി ബന്ധപ്പെട്ട് പരാതികള്‍ വ്യാപകമായതോടെയാണ് ഓപ്പറേഷന്‍ ചാലിയാറെന്ന പേരില്‍ പൊലിസ് പ്രത്യേക പരിശോധനക്കിറങ്ങിയത്. മണല്‍ക്കടത്തിനെത്തുന്നവര്‍ പരിസര പ്രദേശങ്ങളിലെ വീടുകള്‍ക്ക് മുന്നില്‍ മലമൂത്ര വിസര്‍ജനം നടത്തുന്നതായും പൊലിസിന് പരാതി ലഭിച്ചിരുന്നു.