കോട്ടയം: ഇടവക വികാരിക്കെതിരെ ജനങ്ങള്‍ പ്രക്ഷോഭത്തിലേക്ക്. വിജയപുരം രൂപതയിലെ വേളൂര്‍ പുളിനാക്കല്‍ പള്ളി വികാരി പോള്‍ ചാലാവീട്ടിലിന്റെ നടപടികള്‍ക്കെതിരെ ഇടവകയിലെ ഒരു വിഭാഗമാണ് പ്രതിഷേധവുമായി രംഗത്തെത്തിയിരിക്കുന്നത്.
ഇടവകയിലെ അംഗങ്ങളെ പരസ്പരം തമ്മിലടിപ്പിക്കുകയും, തെരുവുഗുണ്ടയെപ്പോലെ പെരുമാറുകയും ചെയ്യുന്നതില്‍ പ്രതിഷേധിച്ചാണ് ഇടവകയിലെ ജനം പ്രത്യക്ഷ സമര പരിപാടിയുമായി രംഗത്തെത്തിയിരിക്കുന്നത്.
വികാരിയുടെ നടപടിക്കെതിരെ പല തവണ രൂപതാധികാരികളോട് പരാതിപ്പെട്ടിട്ടും നടപടിയുണ്ടാവാത്തതിനാലാണ് പ്രത്യക്ഷ സമരപാടിക്ക് രൂപം നല്‍കുന്നതെന്ന് സംയുക്ത സമരസമിതിയുടെ പേരില്‍ തയ്യാറാക്കിയിരിക്കുന്ന നോട്ടീസില്‍ ചൂണ്ടിക്കാട്ടുന്നു.