ശ്രീനഗര്‍:  കണ്ണിലെ വെളിച്ചം കെടുത്തിയ പെല്ലറ്റുകള്‍ക്ക് പക്ഷേ അവളുടെ മനക്കരുത്തിനെ തകര്‍ക്കാനായിട്ടില്ല. ഒരു ദിനം പൊടുന്നനെ വന്നു മൂടിയ ഇരുട്ടിനെ വെളിച്ചമാക്കി, കാതുകള്‍ തകര്‍ക്കുന്ന വെടിയൊച്ചകളെ അകറ്റി നിര്‍ത്തി അവള്‍ പഠിച്ചു. പത്താംക്ലാസ് പരീക്ഷ എഴുതി ജയിച്ചു.

ഇത് ഇന്‍ശ മുശ്താഖ്. 2016 ജൂലൈ 12 മുതല്‍ ലോകം മുഴുവന്‍ അവളെ പെല്ലറ്റ് ഗേള്‍ എന്നു വിളിച്ചു. ബുര്‍ഹാനിയുടെ വാനിയുടെ മരണവുമായി ബന്ധപ്പെട്ട പ്രതിഷേധങ്ങള്‍ ആഞ്ഞടിക്കുന്ന സമയമായിരുന്നു അത്. തന്റെ മുറിയുടെ കുഞ്ഞു ജനാലയിലൂടെ സൈന്യവും പ്രതിഷേധക്കാരും തമ്മിലുള്ള ഏറ്റുമുട്ടല്‍ കാണുകയായിരുന്നു അവള്‍. മുള്ളുപോലെ എന്തോ ഒന്ന് തന്റെ കണ്ണുകളില്‍ തറച്ചതേ അവള്‍ക്ക് ഓര്‍മയുള്ളു. പിന്നീടവള്‍ക്കു മുന്നില്‍ ഇരുട്ടായിരുന്നു. പ്രതിഷേധത്തിന്റെ കല്ലുകളേന്തിയ കൈകളാണ് ആ കുഞ്ഞു കണ്ണുകളിലെ അവസാനത്തെ കാഴ്ച.

തറച്ചു കയറിയ പെല്ലറ്റുകള്‍ അവളുടെ റെറ്റിനയെയും കാഴ്ചയുടെ ഞരമ്പുകളേയും തകര്‍ത്തിരുന്നു. കുഞ്ഞുമോളുടെ കണ്ണിലെ വെളിച്ചം തിരിച്ചു പിടിക്കാന്‍ ഇന്‍ശയുമായി അവളുടെ രക്ഷിതാക്കള്‍ എത്രയോ ആശുപത്രികള്‍ കയറിയിറങ്ങി. എത്രയോ ശസ്ത്രക്രിയകള്‍ നടത്തി. ഫലമുണ്ടായില്ല.

ഒടുവില്‍ ട്രോമയെ അതിജയിച്ച പോലെ തന്റെ ഇരുട്ടിനെ തോല്‍പിക്കാനും തീരുമാനിച്ചു ആ കുഞ്ഞു മിടുക്കി. പോരാട്ടങ്ങള്‍ക്കു ശേഷം കഴിഞ്ഞ മാര്‍ച്ചില്‍ സ്‌കൂള്‍ തുറന്നപ്പോള്‍ അവളും പോയിത്തുടങ്ങി. പഴയ കൂട്ടുകാര്‍..കളിചിരികള്‍..ഒന്നിനും മാറ്റമില്ല. തനിക്കു മുന്നിലെ ഇരുട്ടു പോലും മാഞ്ഞു തുടങ്ങിയ നാളുകളായി അത്. അങ്ങിനെ പത്താം ക്ലാസ് കഴിഞ്ഞു. നന്നായി എഴുതാന്‍ പറ്റാതിരുന്ന കണക്ക് പരീക്ഷ ഒന്നു കൂടെ എഴുതണമെന്നുണ്ട് ഇന്‍ശക്ക്.

' അവള്‍ ഒത്തിരി സന്തോഷവതിയാണ്. പഠിക്കാന്‍ നല്ല ആവേശമുണ്ട്.- ഇന്‍ശയുടെ ഉപ്പ മുശ്താഖ് അഹമദ് ലോണ്‍ പറയുന്നു.

അവളുടെ ജീവിതം ഇനിയൊരിക്കലും പഴയ പോലെയാവില്ലെന്നറിയാം. എന്നാല്‍ അവള്‍ പഠിച്ച് ഉയരങ്ങളിലെത്തണമെന്ന് ഈ നാട് മുഴുവന്‍ ആശിക്കുന്നു. ഗ്രാമീണരുടെ മുഴുവന്‍ പിന്തുണയുമുണ്ട് അവള്‍ക്ക്- അദ്ദേഹം തുടര്‍ന്നു.

പത്താം ക്ലാസ് പൂര്‍ത്തിയാക്കിയ ഇന്‍ശക്ക് അഭിനന്ദന പ്രവാഹമാണ്. മുന്‍മുഖ്യമന്ത്ര ഉമര്‍ അബ്ദുല്ലയും ട്വിറ്റര്‍ വഴി  ഇന്‍ശയെ അഭിനന്ദിച്ചിരുന്നു.