മുക്കം: നോര്‍ത്ത് കാരശ്ശേരി-കാരമൂല-കൂടരഞ്ഞി റോഡിന്റെ പ്രവൃത്തിക്കുള്ള ടെന്‍ഡര്‍ നടപടികള്‍ പൂര്‍ത്തിയായി. കോഴിക്കോട് നാത്ത് കണ്‍സ്ട്രക്ഷന്‍സ് കമ്പനിയാണ് പ്രവൃത്തി കരാറെടുത്തത്. ആറു കമ്പനികള്‍ പങ്കെടുത്ത ടെന്‍ഡറില്‍ ഏറ്റവും കുറഞ്ഞ തുക രേഖപ്പെടുത്തിയ നാത്ത് കമ്പനിക്ക് കരാര്‍ നല്‍കുകയായിരുന്നു. മൂന്നര കോടി രൂപയ്ക്കാണ് കരാര്‍ നല്‍കിയത്. ഇതോടെ റോഡ് പ്രവൃത്തി ഉടന്‍ ആരംഭിക്കാനാവുമെന്നാണ് പ്രതീക്ഷ.
റോഡ് ഗതാഗതത്തിനു ഉപയോഗിക്കാനാകാത്തതില്‍ പ്രതിഷേധിച്ച് റൂട്ടിലോടുന്ന സ്വകാര്യ ബസുകള്‍ കഴിഞ്ഞ മാസം സര്‍വിസ് നിര്‍ത്തിവച്ച് സമരം നടത്തിയിരുന്നു. തുടര്‍ന്നു പ്രവൃത്തി ഉടന്‍ തുടങ്ങുമെന്ന ഉറപ്പില്‍ സമരം പിന്‍വലിച്ചു. നിരവധി സംഘടനകളുടെ പ്രതിഷേധത്തെ തുടര്‍ന്ന് റോഡുപണി വേഗത്തില്‍ തുടങ്ങാന്‍ അധികൃതര്‍ നടപടികള്‍ സ്വീകരിക്കുകയായിരുന്നു.
ടെന്‍ഡര്‍ നടപടികള്‍ കഴിഞ്ഞാലുടന്‍ സാങ്കേതികാനുമതി പുതുക്കി പ്രവൃത്തി ആരംഭിക്കന്‍ സാഹചര്യമൊരുക്കും. ടെന്‍ഡെറെടുക്കുന്ന കോണ്‍ട്രാക്ടറുടെ സഹകരണത്തോടെ മൂന്നു മാസത്തിനുള്ളില്‍ പ്രവൃത്തി പൂര്‍ത്തിയാക്കാനാണ് അധികൃതരുടെ ശ്രമം .
റോഡ് ബി.എം ആന്‍ഡ് ബി.സി നിലവാരത്തില്‍ റോഡിന്റെ പുനരുദ്ധാരണത്തിനു കഴിഞ്ഞ സര്‍ക്കാരിന്റെ കാലത്തു 4.10 കോടി അനുവദിച്ചിരുന്നു. നടപടികള്‍ പൂര്‍ത്തിയാക്കി ടെന്‍ഡര്‍ നല്‍കുകയും ചെയ്തു. പിന്നീട് നിയമസഭാ തെരഞ്ഞെടുപ്പ് കഴിഞ്ഞപ്പോള്‍ കരാറെടുത്തയാള്‍ പിന്മാറി. വീണ്ടും ടെന്‍ഡര്‍ ചെയ്ത് കരാര്‍ മറ്റൊരു കോണ്‍ട്രാക്ടര്‍ക്ക് നല്‍കി. എന്നാല്‍ പുതിയ കരാര്‍ സംബന്ധിച്ച് മറ്റൊരു കരാറുകാരന്‍ കോടതിയെ സമീപിച്ച് സ്റ്റേ വാങ്ങി. ഇതോടെ പ്രവൃത്തി അനിശ്ചിതമായി നീളുകയായിരുന്നു. റോഡ് പ്രവൃത്തി ഉടന്‍ നടത്തണമെന്നാവശ്യപ്പെട്ട് ജില്ലാ പഞ്ചായത്ത് മെമ്പര്‍ സി.കെ കാസിമും കേസില്‍ കക്ഷി ചേരുകയും ചെയ്തു. തുടര്‍ന്നു സ്ഥലം എം.എല്‍.എ ജോര്‍ജ് എം. തോമസും പി.ഡബ്ല്യു.ഡി അധികൃതരും മുന്‍കൈയെടുത്ത് നടപടി ക്രമങ്ങള്‍ പൂര്‍ത്തിയാക്കി ടെന്‍ഡര്‍ ചെയ്യാന്‍ സാഹചര്യമൊരുക്കുകയായിരുന്നു.