കൊച്ചി: നടിയെ ആക്രമിച്ച കേസില്‍ ദിലീപിനെതിരെ നിലപാട് കടുപ്പിച്ച് പൊലിസ്. നടി ആക്രമിക്കപ്പെട്ട ദൃശ്യങ്ങള്‍ ദിലീപിന് കൈമാറരുത് എന്ന് പ്രോസിക്യൂഷന്‍ കോടതിയെ അറിയിക്കും.

കേസില്‍ ദൃശ്യങ്ങളടക്കം തനിക്കെതിരായ തെളിവുകളുടെ മുഴുവന്‍ പകര്‍പ്പും ആവശ്യപെട്ട് ദിലീപ് നല്‍കിയ ഹരജികള്‍ ഇന്ന് കോടതി പരിഗണിക്കുന്നുണ്ട്. ഈ ഹരജിയില്‍ എതിര്‍ സത്യവാങ്മൂലം നല്‍കാന്‍ കൂടുതല്‍ സമയം തേടാനും പൊലിസ് തീരുമാനിച്ചിട്ടുണ്ട്.

അതേസമയം, കുറ്റപത്രം ചോര്‍ത്തി നല്‍കി എന്ന ദിലീപിന്റെ ഹരജിയില്‍ ഇന്ന് വിധി വന്നേക്കും. എന്നാല്‍ ഇക്കാര്യം അന്വേഷണസംഘം കോടതിയില്‍ നിഷേധിച്ചിട്ടുണ്ട്.

നടിയെ ആക്രമിച്ച് മുഖ്യപ്രതി സുനില്‍ കുമാര്‍ പകര്‍ത്തിയ ദൃശ്യങ്ങളും രണ്ടാം ഘട്ട കുറ്റപത്രത്തൊടൊപ്പം പൊലിസ് ഹാജരാക്കിയ തെളിവുകളുടെ പകര്‍പ്പുകളും വേണമെന്നാണ് ദിലീപ് കോടതിയില്‍ ആവശ്യപ്പെട്ടിട്ടുള്ളത്. ദൃശ്യങ്ങള്‍ ഏതെങ്കിലും തരത്തില്‍ പുറത്തുപോകുന്നത് നടിയുടെ സ്വകാര്യതയെ ബാധിക്കുമെന്നാണ് പൊലിസ് വാദം.

ഇക്കാര്യം ആവശ്യപ്പെട്ട് ദിലീപ് നേരത്തെ നല്‍കിയ ഹരജിയില്‍ ദൃശ്യങ്ങള്‍ നല്‍കാനാവില്ലെന്ന് കോടതി വ്യക്തമാക്കിയിരുന്നു. എന്നാല്‍ പിന്നീട് പുതിയ കാരണങ്ങള്‍ ചൂണ്ടിക്കാട്ടി പുതിയ ഹരജി നല്‍കുകയായിരുന്നു.

നേരത്തെ ദിലീപിന്റെ അഭിഭാഷകന്‍ മജിസ്‌ട്രേറ്റിന്റെ സാന്നിധ്യത്തില്‍ നടി ആക്രമിക്കപ്പെടുന്ന ദൃശ്യങ്ങള്‍ പരിശോധിച്ചിരുന്നു. ഓടുന്ന വണ്ടിയില്‍ വെച്ചല്ല പീഡനം നടന്നിരിക്കുന്നതെന്നും മൊഴിയും ദൃശ്യങ്ങളും തമ്മില്‍ പൊരുത്തക്കേടുണ്ടെന്നും ദിലീപ് ഹരജിയില്‍ ചൂണ്ടിക്കാട്ടുന്നുണ്ട്.