തൊടുപുഴ: കെ.എസ്.ഇ.ബി ഹൈഡല്‍ ടൂറിസം വിഭാഗം ടുളിപ് ഗാര്‍ഡന്‍ നിര്‍മിക്കുന്നു. യൂറോപ്പില്‍ കാണപ്പെടുന്ന അത്യാകര്‍ഷകമായ പുഷ്പമാണ് ടുളിപ്. കുണ്ടള സേതുപാര്‍വതീപുരം ഡാമിന് സമീപമുള്ള 30 ഏക്കര്‍ സ്ഥലത്താണ് ഗാര്‍ഡന്‍ സ്ഥാപിക്കുന്നത്.
ഇതുസംബന്ധിച്ചുള്ള നടപടിക്രമങ്ങള്‍ അവസാനഘട്ടത്തിലാണെന്ന് കെ.എസ്.ഇ.ബി ഹൈഡല്‍ ടൂറിസം ഡയരക്ടര്‍ കെ.ജെ ജോസ് സുപ്രഭാതത്തോട് പറഞ്ഞു. പദ്ധതി നിര്‍മാണവുമായി ബന്ധപ്പെട്ട് കണ്‍സള്‍ട്ടന്റിനെ ചുമതലപ്പെടുത്തിക്കഴിഞ്ഞു.
നിശ്ചലപ്രകൃതിയും അതീവ ശീതകാലാവസ്ഥയുമുള്ള കുണ്ടള, യൂറോപ്യന്‍ ഭൂപ്രകൃതിയുടെ പതിപ്പാണെന്നാണ് ഇവിടെയെത്തുന്ന സഞ്ചാരികള്‍ പറയുന്നത്. നിലവില്‍ ഇന്ത്യയില്‍ കശ്മിരില്‍ മാത്രമാണ് ടുളിപ് ഗാര്‍ഡനുള്ളത്. 2007ല്‍ തുടക്കമിട്ട ശ്രീനഗര്‍ ഇന്ദിരാഗാന്ധി മെമ്മോറിയല്‍ ടുളിപ് ഗാര്‍ഡനാണ് കശ്മിരിന്റെ ഏറ്റവും വലിയ ആകര്‍ഷണീയതയില്‍ ഒന്ന്.
കുണ്ടളയുടെ വശ്യഭംഗി ആസ്വദിക്കാന്‍ സഞ്ചാരികള്‍ക്കായി സൗരോര്‍ജ ബോട്ടുകള്‍ സര്‍വിസ് തുടങ്ങിയിട്ടുണ്ട്. വന്യമൃഗങ്ങള്‍ക്കും മറ്റും ശല്യമാവുന്ന ശബ്ദമലിനീകരണം ഒഴിവാക്കാനായി ഇവിടെ മോട്ടോര്‍ ബോട്ടുകള്‍ നിരോധിച്ചിരുന്നു.
സൗരോര്‍ജത്തില്‍ പ്രവര്‍ത്തിക്കുന്നതും ശബ്ദം തീരെയില്ലാത്തതുമായ മോട്ടോറുകളാണ് പുതിയ ബോട്ടുകളില്‍ ഉപയോഗിക്കുന്നത്. തേയിലത്തോട്ടങ്ങള്‍ക്കും കാടുകള്‍ക്കും നടുവില്‍ സ്ഥിതിചെയ്യുന്ന കുണ്ടള ജലാശയം ഇപ്പോള്‍ പൂര്‍ണമായി നിറഞ്ഞുകിടക്കുകയാണ്. സമുദ്രനിരപ്പില്‍ നിന്ന് 5,800 അടി ഉയരത്തിലാണ് കുണ്ടള ഡാം സ്ഥിതിചെയ്യുന്നത്. പള്ളിവാസല്‍ പവര്‍ ഹൗസിന്റെ സ്റ്റോറേജ് ഡാമായ കുണ്ടള 1946ല്‍ തിരുവിതാംകൂര്‍ മഹാരാജാവാണ് നിര്‍മിച്ചത്.
കുണ്ടളയിലെ മണ്ണുകൊണ്ടുണ്ടള്ള ആര്‍ച്ച് ഡാമാണ് മൂന്നാറിലെത്തുന്ന വിനോദസഞ്ചാരികളുടെ മുഖ്യ ആകര്‍ഷണം. 160 ഏക്കര്‍ ചുറ്റളവില്‍ 60 അടി ഉയരത്തില്‍ വെള്ളം സംഭരിക്കാവുന്ന ഈ അണക്കെട്ട് ചുറ്റുമുള്ള മലനിരകളിലെ ഉറവകളാല്‍ വര്‍ഷംമുഴുവന്‍ നിറഞ്ഞുകിടക്കും. ഒരു പുഴയുടെയും കുറുകെയല്ല കുണ്ടളയിലെ അണക്കെട്ട് നിര്‍മിച്ചിരിക്കുന്നതെന്നതാണ് പ്രത്യേകത.