തിരൂരങ്ങാടി: ദാറുല്‍ ഹുദാ ഇസ്‌ലാമിക് സര്‍വകലാശാലയുടെ അഞ്ചാമത് ഓഫ് കാംപസിന് മഹാരാഷ്ട്രയിലെ വഡോളിയില്‍ നാളെ തറക്കല്ലിടും. ദാറുല്‍ ഹുദാ ചാന്‍സലര്‍ സയ്യിദ് ഹൈദരലി ശിഹാബ് തങ്ങള്‍ ശിലാസ്ഥാപന കര്‍മം നിര്‍വഹിക്കും. വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും. ദാറുല്‍ ഹുദാ മാനേജിംഗ് കമ്മിറ്റി ഭാരവാഹികളായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ഡോ. യു.വി.കെ മുഹമ്മദ്, യു. ശാഫി ഹാജി ചെമ്മാട് തുടങ്ങിയ നിരവധി പേര്‍ ചടങ്ങില്‍ സംബന്ധിക്കും.
മഹാരാഷ്ട്രയിലെ ഭീവണ്ടിക്കടുത്ത് വഡോളിയില്‍ രണ്ട് ഏക്കര്‍ സ്ഥലത്താണ് പുതിയ കാംപസിന് തറക്കല്ലിടുന്നത്. നിലവില്‍ സീമാന്ധ്രയിലെ ചിറ്റൂര്‍ ജില്ലയിലെ പുങ്കനൂരിലും പശ്ചിമ ബംഗാളിലെ ബീര്‍ഭൂം ജില്ലയിലെ ഭീംപൂരിലും ആസാമിലെ ബാര്‍പേട്ട ജില്ലയിലെ ബൈശയിലും കര്‍ണാടകയിലെ ഹാവേരി ജില്ലയിലെ ഹാന്‍ഗലിലും വാഴ്‌സിറ്റിയുടെ കാംപസുകള്‍ പ്രവര്‍ത്തിക്കുന്നുണ്ട്.
വിവിധ ഓഫ് കാംപസുകള്‍ക്ക് പുറമെ മുംബൈക്കടുത്ത് ഡോംഗ്രിയിലും കര്‍ണാടകയിലെ കാശിപട്ണ, മാടന്നൂര്‍ എന്നിവിടങ്ങളിലും വാഴ്‌സിറ്റിയുടെ യു.ജി കോളജുകളും പ്രവര്‍ത്തിക്കുന്നുണ്ട്.