വടക്കാഞ്ചേരി: ആചാര വൈവിധ്യങ്ങളുടെ സമ്മോഹന നിമിഷങ്ങള്‍ ഉത്സവ കേരളത്തിന് സമ്മാനിക്കുന്ന മച്ചാട് മാമാങ്ക ചടങ്ങുകള്‍ക്ക് ഇന്ന് തുടക്കം. ഏറെ വൈവിധ്യ ആചാരമായ മാമാങ്ക കൂറയിടയില്‍ ഇന്ന് കാലത്താണ്. എല്ലാ ക്ഷേത്രങ്ങളിലും ഉത്സവം കൊടിയേറുമ്പോള്‍ മാമാങ്കത്തിന് കൂറയിടല്‍ ചടങ്ങാണ്.
നടത്തിപ്പ് ദേശക്കാര്‍ കാലത്ത് ദേശത്ത് നിന്ന് മുറിച്ചെടുക്കുന്ന മുള തോളിലേറ്റി ക്ഷേത്ര സന്നിധിയില്‍ എത്തിക്കുന്നതോടെയാണ് ചടങ്ങുകള്‍ ആരംഭിക്കുക. തുടര്‍ന്ന് ദേശത്തെ തച്ഛന്‍ മുള മുറിച്ചെടുത്ത് അലകുകളാക്കും. പ്രത്യേകരീതിയില്‍ ചെത്തി ഉഴിഞ്ഞ് മറയാക്കി മാറ്റും. പൂജിച്ച മുള മറയില്‍ ആലിലയും, പൂമാലയും ചാര്‍ത്തി ദേശവാസികളുടെ നേതൃത്വത്തില്‍ ക്ഷേത്രത്തിന്റെ കുതിര പ്രദിക്ഷിണ വഴിയില്‍ വടക്കും വാതില്‍ക്കലില്‍ സ്ഥാപിയ്ക്കുന്നതോടെയാണ് കൂറയിടല്‍ പൂര്‍ത്തിയാക്കുക.
മാമാങ്ക കമ്മിറ്റി പ്രസിഡന്റ് രഘു പാലിശ്ശേരി,സെക്രട്ടറി പി.എന്‍ ശങ്കരനാരായണന്‍, ഖജാന്‍ജി കെ.എന്‍ പരമേശ്വരന്‍ എന്നിവരുടെ നേതൃത്വത്തിലാണ് ചടങ്ങുകള്‍. മാമാങ്കത്തിന്റെ വരവറിയിച്ച് ഫെബ്രുവരി 16ന് സാംസ്‌കാരിക ഘോഷയാത്ര നടക്കും.