ശ്രീനഗര്‍: ദക്ഷിണ കശ്മിരിലെ ഷോപിയാന്‍ ജില്ലയില്‍ പ്രതിഷേധക്കാര്‍ക്കുനേരെ സുരക്ഷാസേന നടത്തിയ വെടിവയ്പില്‍ രണ്ടുപേര്‍ കൊല്ലപ്പെട്ടു. നിരവധിപേര്‍ക്ക് പരുക്കേറ്റു. സംഭവത്തെക്കുറിച്ച് മജിസ്‌ട്രേറ്റ്തല അന്വേഷണത്തിന് സര്‍ക്കാര്‍ ഉത്തരവിട്ടു. അന്വേഷണ റിപ്പോര്‍ട്ട് 20 ദിവസത്തിനകം നല്‍കാനും ആവശ്യപ്പെട്ടിട്ടുണ്ട്.
ഷോപിയാനില്‍ സൈനിക വാഹനത്തിനുനേരെയുണ്ടായ ആക്രമണമാണ് വെടിവയ്പിന് ഇടയാക്കിയതെന്ന് ജില്ലാ പോലിസ് സൂപ്രണ്ട് ശ്രീരാം അംബാര്‍കര്‍ അറിയിച്ചു. ഇന്നലെ വൈകിട്ട് ജില്ലയിലെ ഗണപോറ ഭാഗത്തുകൂടി പോയ സൈനികവാഹനത്തിനു നേരെയാണ് കല്ലേറുണ്ടായത്. ഇവരെ പിരിച്ചുവിടാനായി സൈന്യം നടത്തിയ നീക്കം പരാജയപ്പെട്ടതോടെയാണ് വെടിവയ്പുണ്ടായത്. ജാവിദ് ഭട്ട്, സോഹുല്‍ ഭട്ട് എന്നിവരാണ് മരിച്ചതെന്ന് പിന്നീട് പൊലിസ് അറിയിച്ചു.