കാബൂള്‍: ഇടവേളയ്ക്കു ശേഷം താലിബാന്റെ നേതൃത്വത്തില്‍ ഭീകരാക്രമണങ്ങള്‍ രൂക്ഷമായ അഫ്ഗാനിസ്താനില്‍ സമാധാനം പുനസ്ഥാപിക്കാന്‍ നീക്കവുമായി പാകിസ്താനും ഇന്തോനേഷ്യയും രംഗത്ത്. ഈയൊരു ലക്ഷ്യത്തിനായി ഇരുരാജ്യങ്ങളും കൈകോര്‍ക്കുന്നതായാണു വിവരം. അഫ്ഗാനിലെ ഭീകരപ്രവര്‍ത്തനങ്ങളെ പാകിസ്താന്‍ സഹായിക്കുന്നതായി അമേരിക്ക നിരന്തരം ആരോപണം ഉന്നയിക്കുന്നതിനിടെയാണു പുതിയ നീക്കമെന്നത് ശ്രദ്ധേയമാണ്.
പാകിസ്താന്‍ സന്ദര്‍ശിച്ച ഇന്തോനേഷ്യന്‍ പ്രസിഡന്റ് ജോക്കോ വിദോദോ ആണ് ഇക്കാര്യം അറിയിച്ചത്. തീരുമാനം പാകിസ്താന്‍ പ്രസിഡന്റ് മംനൂന്‍ ഹുസൈനും സ്ഥിരീകരിച്ചിട്ടുണ്ട്.
വിഷയത്തില്‍ പാകിസ്താനുമായി സഹകരിച്ചു പ്രവര്‍ത്തിക്കാന്‍ തീരുമാനിച്ചതായി വിദോദോ പറഞ്ഞു.
മേഖലയില്‍ സമാധാനം പുനസ്ഥാപിക്കുന്ന കാര്യത്തില്‍ പാകിസ്താന്‍, അഫ്ഗാനിസ്താന്‍, ഇന്തോനേഷ്യ എന്നീ രാജ്യങ്ങളിലെ പണ്ഡിതന്മാര്‍ക്ക് വലിയ പങ്കുവഹിക്കാനാകുമെന്ന് അദ്ദേഹം കൂട്ടിച്ചേര്‍ത്തു. വെള്ളിയാഴ്ചയാണ് ദ്വിദിന സന്ദര്‍ശനത്തിനായി ജോക്കോ വിദോദോ പാകിസ്താനിലെത്തിയത്.