കോഴിക്കോട്: രണ്ടിനെതിരേ മൂന്ന് ഗോളുകള്‍ക്ക് ഷില്ലോങ് ലജോങ് എഫ്.സിയെ പരാജയപ്പെടുത്തി ഗോകുലം. ഗോകുലത്തിന്റെ തുടര്‍ച്ചയായ രണ്ടാം ജയമാണിത്. ഇതോടെ സ്വന്തം തട്ടകത്തില്‍ ഇതുവരെ ജയിച്ചിട്ടില്ലെന്ന ചീത്തപ്പേര് ഗോകുലം ഒഴിവാക്കി. 25ാം മിനുട്ടില്‍ കോഫിയിലൂടെ ഷില്ലോങ് ലജോങാണ് ലീഡെടുത്തത്. ആദ്യ പകുതിയില്‍ ഒരു ഗോളിന്റെ ബലത്തില്‍ കളംവിട്ട ലജോങിനെ രണ്ടാം പകുതിയുടെ തുടക്കത്തില്‍ തന്നെ ഗോകുലം ഞെട്ടിച്ചു. 52ാം മിനുട്ടില്‍ മികച്ചൊരു ഫ്രീ കിക്കിലൂടെ അല്‍അജ്മിയാണ് ഗോകുലത്തെ ഒപ്പമെത്തിച്ചത്.
പക്ഷേ 54ാം മിനുട്ടില്‍ ഓജോഹോയിലൂടെ ലജോങ് തിരിച്ചടിച്ചു. ഗോളിന് വേണ്ടി പൊരുതിയ ഗോകുലം 74ാം മിനുട്ടില്‍ കിവിയിലൂടെ വീണ്ടും ഒപ്പമെത്തി. (2-2) കളി സമനിലയില്‍ അവസാനിക്കാനിരിക്കെ പകരക്കാരനായി ഇറങ്ങിയ അര്‍ജുന്‍ ജയരാജ് 90ാം മിനുട്ടില്‍ നേടിയ ഗോളില്‍ ഗോകുലം വിജയം പിടിച്ചെടുക്കുകയായിരുന്നു.
ഇതോടെ 11 കളികളില്‍ മൂന്ന് ജയവും ഒരു സമനിലയും ഏഴു തോല്‍വിയുമടക്കം 10 പോയിന്റോടെ ഗോകുലം പട്ടികയില്‍ എട്ടാം സ്ഥാനത്തെത്തി. ഗോള്‍ ശരാശരിയുടെ അടിസ്ഥാനത്തിലാണ് കേരളം എട്ടാം സ്ഥാനത്തുള്ളത്. ഒന്‍പതാം സ്ഥാനത്തുള്ള ചെന്നൈക്കും 10ാം സ്ഥാനത്തുള്ള ചര്‍ച്ചിലിനും 10 പോയിന്റാണ്.