തൊടുപുഴ: വാറ്റുകേന്ദ്രത്തില്‍ നടന്ന പരിശോധനയില്‍ കോടയും ചാരായവും വാറ്റുപകരണങ്ങളും പിടികൂടി.
തൊടുപുഴ പെരിയാമ്പ്ര തുറക്കല്‍ ജിജോയുടെ ഉടമസ്ഥതയിലുള്ള വീട്ടില്‍ നിന്നാണ് 150 ലിറ്റര്‍ കോടയും 14 ലിറ്റര്‍ ചാരായവും വാറ്റുപകരണങ്ങളും എക്‌സൈസ് സംഘം കണ്ടെത്തിയത്. ഇവിടെ നിന്ന് മൂന്ന് പേരേയും കസ്റ്റഡിയിലെടുത്തു.ജിജോയും സുഹൃത്തക്കളായ ചെമ്പാലയില്‍ ബെന്നി (50), പാലക്കുന്നേല്‍ ജോബി (35) എന്നിവരുമാണ് എക്‌സൈസ് സംഘത്തിന്റെ പിടിയിലായത്.
രഹസ്യ വിവരത്തിന്റെ അടിസ്ഥാനത്തില്‍ ഇന്നലെ രാവിലെ 11.45ഓടെയാണ് വാറ്റ് കേന്ദ്രത്തില്‍ പരിശോധന നടത്തുന്നത്. ഇത് ജിജോയുടെ പഴയ വീടാണ്. അടുത്തു തന്നെ ഒരു പന്നി ഫാമുണ്ട്. ഇവിടുത്തെ ദുര്‍ഗന്ധം കാരണം അധികമാരും ഈ വഴിക്ക് വരാറില്ല. ഇതിന്റെ മറവിലാണ് വാറ്റ് നടത്തിയിരുന്നതെന്ന് എക്‌സൈസ് ഉദ്യോഗസ്ഥര്‍ പറഞ്ഞു. ഉദ്യോഗസ്ഥരെത്തുമ്പോള്‍ ചാരായം വാറ്റിക്കൊണ്ടിരിക്കുകയായിരുന്നു.