കായംകുളം: മുസ്‌ലിം ലീഗ് ദേശീയ അധ്യക്ഷനും മുന്‍ കേന്ദ്ര റെയില്‍വേ സഹമന്ത്രിയും കേരളത്തിന്റെ മുന്‍ വ്യവസായി വകുപ്പ് മന്ത്രിയുമായ ഇ. അഹമ്മദിന്റെ മരണവുമായി ബന്ധപ്പെട്ട് ഡല്‍ഹിയില്‍ ഉണ്ടായ സംഭവവികാസങ്ങള്‍ അങ്ങേയറ്റം ദുഃഖകരവും നിര്‍ഭാഗ്യകരവുമാണെന്ന് കെ.സി. വേണുഗോപാല്‍ എംപി. പറഞ്ഞു.
അദ്ദേഹത്തെപ്പോലെ ലോകം അറിയപ്പെടുന്ന വ്യക്തിത്വത്തിന് മരണാനന്തര ഘട്ടത്തില്‍ ഇത്തരമൊരു അനുഭവമുണ്ടായത് ഉള്‍ക്കൊള്ളാനാവില്ല. കേന്ദ്രത്തിലെ നരേന്ദ്രമോഡി ഗവണ്‍മെന്റിന്റെ ക്രൂരമായ കാടത്തമാണ് ഇതിലൂടെ പുറത്തുവന്നത്. മുസ്‌ലിം ലീഗ് ആലപ്പുഴ ജില്ലാ കമ്മിറ്റി സംഘടിപ്പിച്ച പ്രതിഷേധ സംഗമം കായംകുളം പാര്‍ക്ക് മൈതാനിയില്‍ ഉത്ഘാടനം ചെയ്യുകയായിരുന്നു അദ്ദേഹം.
ഇന്ത്യയുടെ പരമോന്നത ശ്രീകോവിലായ പാര്‍ലമെന്റ് മന്ദിരത്തില്‍ പണ്ഡിറ്റ് ജവഹര്‍ലാല്‍ നെഹ്‌റു ഇന്ത്യക്ക് സ്വാതന്ത്ര്യം കിട്ടിയപ്പോള്‍ ഇന്ത്യന്‍ ജനതയെ അഭിസംബോധന ചെയ്ത ഈ പവിത്രമായ ഈ മന്ദിരത്തില്‍വെച്ച് അഹമ്മദിന് സംഭവിച്ച മരണത്തെ വളരെ നിന്ദ്യമായിട്ടാണ് കേന്ദ്ര ഭരണകൂടം കണ്ടത്.
കാല്‍നൂറ്റാണ്ടുകാലം പാര്‍ലമെന്റ് അംഗവും പത്ത് വര്‍ഷം കേന്ദ്ര സഹമന്ത്രി പദവിയില്‍ ഇരിക്കെ രാജ്യത്തിനുവേണ്ടി അന്താരാഷ്ട്രവേദികളില്‍ ശബ്ദം ഉയര്‍ത്തുകയും ചെയ്ത ഇ. അഹമ്മദിന്റെ മൃതദേഹത്തെ അപമാനിക്കാന്‍ ഗൂഢാലോചന നടത്തിയത് അത്യന്തം ലജ്ജാകരവും വേദനാജനകവുമായി.
ബ്ജറ്റ് തടസപ്പെടുമെന്ന ആശങ്കയുണ്ടായിരുന്നുവെങ്കില്‍ സര്‍ക്കാരിന് അത് ബന്ധുക്കളും പാര്‍ട്ടി നേതൃത്വവുമായി തുറന്ന് സംസാരിക്കാമായിരുന്നു.
അവസാന സമയത്ത് തങ്ങളുടെ പിതാവിനെ കാണുവാനുള്ള അവസരം മക്കള്‍ക്കു നിഷേധിച്ചതും ചികിത്സസംബന്ധമായ വിവരങ്ങള്‍ അഹമ്മദിന്റെ മക്കള്‍ ഡോക്ടര്‍മാരായിട്ടുപോലും മറച്ചുവെച്ചതും ദുരൂഹമാണ്. യോഗത്തില്‍ മുസ്‌ലിം ലീഗ് ജില്ലാ വൈസ് പ്രസിഡന്റ് എ. യഹിയ അദ്ധ്യക്ഷത വഹിച്ചു. മുസ്‌ലിം ലീഗ് ജില്ലാ ജനറല്‍ സെക്രട്ടറി എ.എം. നസീര്‍ സ്വാഗതം പറഞ്ഞു.
ചുനക്കര ജനാര്‍ദ്ധനന്‍നായര്‍, കോണ്‍ഗ്രസ് നേതാക്കളായ അഡ്വ. സി.ആര്‍. ജയപ്രകാശ്, അഡ്വ. പി.സി. രഞ്ചി, കേരള കോണ്‍ഗ്രസ് നേതാവ് അഡ്വ. ജോസഫ് ജോണ്‍, ജനതാദള്‍ നേതാവ് ഷേയ്ക്ക് പി. ഹാരീസ്, മുസ്ലിം ലീഗ് ജില്ലാ നേതാക്കളായ അബ്ദുല്‍സലാം ലബ്ബ, മുഹമ്മദ് കൊച്ചുകളം, ബി.എ. ഗഫൂര്‍, എ. ഇര്‍ഷാദ്, അഡ്വ. എച്ച്. ബഷീര്‍കുട്ടി, നിയോജകമണ്ഡലം പ്രസിഡന്റ് ജെ. മുഹമ്മദ്കുഞ്ഞ്, ഷാഹുല്‍ഹമീദ് റാവുത്തര്‍, പൂക്കുഞ്ഞ് കോട്ടപ്പുറം, എസ്. അബ്ദുല്‍സലാം, സഫീര്‍ പീടിയേക്കല്‍, കായംകുളം മുനിസിപ്പല്‍ ചെയര്‍മാന്‍ അഡ്വ. ശിവദാസന്‍, എ. ത്വാഹാമൗലവി, കായംകുളം ടൗണ്‍ പള്ളി ഇമാം കെ. ജലാലുദ്ദീന്‍ മൗലവി, പേഴ്‌സണല്‍ ലാ ബോര്‍ഡ് മെമ്പര്‍ ഷുക്കൂര്‍ മൗലവി, ശ്യാംസുന്ദര്‍, പി.കെ. കൊച്ചുകുഞ്ഞ്, ബി.എ. റസാക്ക്, യൂത്ത് ലീഗ് നേതാക്കളായ ഷാജഹാന്‍ ആറാട്ടുപുഴ, പി. ബിജു, മുസ്‌ലിം ലീഗ് നിയോജകമണ്ഡലം ജനറല്‍ സെക്രട്ടറി ഇ. സുധീര്‍ തുടങ്ങിയവര്‍ സംസാരിച്ചു.