റിയാദ്: സഊദിയില്‍ രണ്ടിടങ്ങളിലായി നടന്ന മയക്കു മരുന്ന് വേട്ടയില്‍ ഏഴു ലക്ഷത്തോളം മയക്കു മരുന്ന് ഗുളികകള്‍ പിടികൂടി. രണ്ടു ദിവസത്തിനിടെ ജിദ്ദ, റിയാദ് എന്നീ നഗരങ്ങളില്‍ നടന്ന പരിശോധനയിലാണ് സഊദി നാര്‍കോട്ടിക് സെല്‍ മയക്കു മരുന്ന് ഗുളികകള്‍ പിടികൂടിയത്. ഇതിനു പിന്നില്‍ പ്രവര്‍ത്തിച്ച അഞ്ചു പേരെ അറസ്റ്റ് ചെയ്ത്തിട്ടുമുണ്ട്.

പിടികൂടിയവരില്‍ മൂന്നു പേര്‍ സ്വദേശികളും രണ്ടു പേര്‍ സിറിയക്കാരുമാണ്്. ജിദ്ദ കിങ് അബ്ദുല്‍ അസീസ് അന്താരാഷ്ട്ര വിമാനത്താവളം വഴി മയക്കുമരുന്ന് കടത്താനുള്ള ആറു ശ്രമങ്ങള്‍ ഈയാഴ്ച പരാജയപ്പെടുത്തിയതായി വിമാനത്താവള വൃത്തങ്ങള്‍ അറിയിച്ചു.

പിടിച്ചെടുത്തവയില്‍ രണ്ടു കിലോ ഹെറോയിനും ഉള്‍പ്പെടും. വിമാനത്താവളം വഴി സൗദിയിലേക്ക് മയക്കുമരുന്ന് കടത്തുകയായിരുന്ന മൂന്നു പേരെ തിങ്കളാഴ്ച പിടികൂടിയിരുന്നു. ധരിച്ചിരുന്ന ഷൂസിനടിയിലും ഭക്ഷണ പാത്രത്തിലും വയറിനുള്ളിലും ഒളിപ്പിച്ചാണ് ഇവര്‍ ഗുളികകള്‍ കടത്താന്‍ ശ്രമിച്ചത്.