കൊച്ചി: ഈ വര്‍ഷത്തെ ജില്ലാ സ്‌കൂള്‍ പ്രവേശനോത്സവം നാളെ പുത്തന്‍തോട് ഗവ.ഹയര്‍സെക്കന്‍ഡറി സ്‌കൂളില്‍ നടക്കുമെന്ന് സര്‍വശിക്ഷാ അഭിയാന്‍ (എസ്.എസ്.എ) ജില്ലാ പ്രോജക്ട് ഓഫിസര്‍ എസ് സന്തോഷ് കുമാര്‍ വാര്‍ത്താ സമ്മേളനത്തില്‍ അറിയിച്ചു. രാവിലെ ഒന്‍പതിന് ചെല്ലാനം ഗ്രാമപഞ്ചായത്ത് അങ്കണത്തില്‍ നിന്നും ഘോഷയാത്രയോടെ ചടങ്ങുകള്‍ ആരംഭിക്കും.
ചെല്ലാനം ഗ്രാമപഞ്ചായത്ത് പ്രസിഡന്റ് മേഴ്‌സി ജോസി ഘോഷയാത്ര ഫ്‌ളാഗ് ഓഫ് ചെയ്യും. തുടര്‍ന്ന് നടക്കുന്ന പൊതു സമ്മേളനത്തില്‍ നിയുക്ത എം.എല്‍.എ കെ.ജെ മാക്‌സി അധ്യക്ഷത വഹിക്കും. പ്രൊഫ. കെ.വി തോമസ് എം.പി പ്രവേശനോത്സവം ഉദ്ഘാടനം ചെയ്യും. തുടര്‍ന്നു നവാഗത വിദ്യാര്‍ഥികള്‍ ചേര്‍ന്ന് അക്ഷരദീപം തെളിയിക്കും. ജില്ലാ പഞ്ചായത്ത് പ്രസിഡന്റ് ആശ സനില്‍ ചടങ്ങില്‍ മുഖ്യ പ്രഭാഷണം നടത്തും. പ്രധാനാധ്യാപിക എന്‍ ഗിരിജ പ്രവേശനോത്സവ സന്ദേശം നല്‍കും. പള്ളുരുത്തി ബ്ലോക്ക് പഞ്ചായത്ത് പ്രസിഡന്റ് സി.എസ് പീതാംബരന്‍ എസ്.എസ്.എ കെട്ടിട ഉദ്ഘാടനം നിര്‍വഹിക്കും. ജില്ലാ പഞ്ചായത്ത് വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ ജാന്‍സി ജോര്‍ജ് പഠനോപകരണ കിറ്റ് വിതരണം ചെയ്യും.

കുട്ടികളില്‍ പരിസ്ഥിതി ബോധം വളര്‍ത്താന്‍ ശുചിത്വ മിഷന്റെ നേതൃത്വത്തില്‍ വൃക്ഷത്തൈ വിതരണം നടത്തും. സൗജന്യ യൂനിഫോം, പാഠപുസ്തകങ്ങള്‍, സ്‌കൂളുകള്‍ക്കുള്ള വിവിധ ഗ്രാന്റുകള്‍ എന്നിവയുടെ വിതരണോദ്ഘാടനവും ചടങ്ങില്‍ നടക്കും. മട്ടാഞ്ചേരി ബി.ആര്‍.സിയുടെ നേതൃത്വത്തില്‍ എസ്.എസ്.എ നിര്‍മിച്ച ഷോര്‍ട്ട് ഫിലിം ചലച്ചിത്ര താരം മോളി കണ്ണമാലി പ്രകാശനം ചെയ്യും.
സ്‌കൂളില്‍ നിന്നും മികച്ച വിജയം കൈവരിച്ച വിദ്യാര്‍ഥികളെ ചടങ്ങില്‍ ആദരിക്കും. കഴിഞ്ഞ വര്‍ഷം ജില്ലയില്‍ 17,000 വിദ്യാര്‍ത്ഥികളാണ് പ്രവേശനം നേടിയതെന്നും ഇക്കുറി അതിലും കൂടുതല്‍ കുട്ടികള്‍ എത്തിയിട്ടുണ്ടെന്നും എസ് സന്തോഷ് കുമാര്‍ പറഞ്ഞു. 108 വര്‍ഷം പിന്നിടുന്ന പുത്തന്‍തോട് ഗവ. ഹയര്‍സെക്കന്‍ഡറി സ്‌കൂള്‍ പാഠ്യ-പാഠ്യേതര രംഗത്ത് മികച്ച പ്രകടനം കാഴ്ചവച്ചുവരുന്ന വിദ്യാലയമാണെന്നും, ജില്ലയില്‍ ഏറ്റവും അധികം കുട്ടികള്‍ പഠിക്കുന്ന സ്‌കൂളാണന്നും അദ്ദേഹം പറഞ്ഞു. ഇക്കാരണങ്ങളാലാണു പ്രവേശനോത്സവത്തിനു പുത്തന്‍തോട് സ്‌കൂള്‍ തെരഞ്ഞെടുത്തതെന്നും അദ്ദേഹം കൂട്ടിച്ചേര്‍ത്തു. വാര്‍ത്താ സമ്മേളനത്തില്‍ എസ്.എസ്.എ ജില്ലാ പ്രോഗ്രാം ഓഫിസര്‍ സജോയ് ജോര്‍ജ്ജ്, പുത്തന്‍തോട് ഗവ. ഹയര്‍സെക്കന്‍ഡറി സ്‌കൂള്‍ ഹെഡ്മിസ്ട്രസ് എന്‍ ഗിരിജ, പബ്ലിസിറ്റി കണ്‍വീനര്‍ പ്രകാശ് വി പ്രഭു എന്നിവരുംപങ്കെടുത്തു.