മലപ്പുറം: അനാവശ്യ മാനദണ്ഡങ്ങള്‍ കൊണ്ടുവന്ന് ക്ഷേമപെന്‍ഷന്‍ വാങ്ങുന്നവരുടെ എണ്ണം നിയന്ത്രിക്കാനുള്ള ബജറ്റ് നിര്‍ദേശത്തിനെതിരേ സി.പി.ഐ. ക്ഷേമപെന്‍ഷന്‍ സാധാരണക്കാരന്റെ അവകാശമാണെന്നും അത് മാനദണ്ഡങ്ങള്‍ വച്ച് തടയാന്‍ പാടില്ലെന്നും സി.പി.ഐ സംസ്ഥാന എക്‌സിക്യൂട്ടീവ് അംഗം കെ.പി രാജേന്ദ്രന്‍ പറഞ്ഞു. സി.പി.ഐ സംസ്ഥാന സമ്മേളനത്തിന്റെ മുന്നോടിയായി മലപ്പുറത്ത് വിളിച്ചുചേര്‍ത്ത വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
വീട്ടില്‍ ആദായ നികുതി അടക്കുന്നവരുണ്ടെന്ന പേരിലോ കാറുണ്ടെന്ന കാരണത്താലോ പ്രായമായവരുടെ അവകാശം തടയാന്‍ പാടില്ല. ബജറ്റ് മറുപടി പ്രസംഗത്തില്‍ ഈ തീരുമാനം പിന്‍വലിച്ച് ധനമന്ത്രി പ്രസ്താവന ഇറക്കണമെന്നും അദ്ദേഹം പറഞ്ഞു. മാര്‍ച്ച് ഒന്നുമുതല്‍ നാലുവരെ സി.പി.ഐ സംസ്ഥാന സമ്മേളനം മലപ്പുറത്താണ് നടക്കുന്നത്. ഇതിന്റെ ഭാഗമായി വിപുലമായ പരിപാടികള്‍ക്കാണ് സ്വാഗത സംഘം രൂപം നല്‍കിയിരിക്കുന്നത്.